म. टा. प्रतिनिधी, नागपूर
उपराजधानी भोवती करकचून आवळत चाललेला संसर्गजन्य आजारांचा विळखा सुटेनासा झाला आहे. एन सणासूदीतही या आजारांचे मृत्यूसत्र सुरूच होते. गेल्या चार महिन्यांमध्ये विदर्भातील दोनशेहून अधिक जणांना स्क्रब टायफसने कवेत घेतले होते. त्यामुळे या आजाराच्या मृत्यूची संख्या आता ३२ वर पोचली आहे. तर दुसरीकडे स्वाइन फ्लूच्याही दोन रुग्णांची त्यात भर पडली आहे. त्यामुळे संपूर्ण विदर्भावर सध्या स्क्रब, स्वाइन पाठोपाठ डेंग्यूचीही दहशत कायम आहे.
शिला चित्रे (वय ४५) असे स्क्रब टायफसने दगावलेल्या महिलेचे नाव आहे. त्यांना ताप, डोकेदुखी, हात-पाय दुखणे, मळमळ, ओकारी होण्याचा त्रासामुळे प्रथम गोंदियातील रुग्णालयात भरती केले. मात्र आराम पडत नसल्याने नातेवाईकांनी त्यांना नागपूरच्या शासकीय वैद्यकीय महाविद्यालय व रुग्णालयात (मेडिकल) हलवले. वैद्यकीय तपासणीत त्यांना स्क्रब टायफस असल्याचे निदान झाले. उपचारादरम्यान त्यांचा मृत्यू झाल्याची नोंद महापालिकेच्या आरोग्य विभागाने घेतली आहे. त्यामुळे नागपूर विभागात आजपर्यंत या आजाराने दगावलेल्या रुग्णांची संख्या ३२ वर पोहचली. तर या आजाराची लागण झालेल्यांची संख्याही आता २०० वर पोहचली आहे. गवतासह लहान उंचीच्या वृक्षांवर आढळणाजया पिसवा या सूक्ष्म किटकांनी चावा घेतल्याने हा आजार होतो. हे पिसवे उंदरांवर घट्ट चिटकून बसतात. उंदरामुळे हे पिसवे इतरत्र पसरून हा आजार वाढण्यास मदत होत असल्याचे डॉक्टरांनी सांगितले.
डेंग्यूचीही दहशत कायम
नागपूर विभागात स्वाइन फ्लूचेही रुग्ण वाढत आहेत. मागील तीन दिवसांत शहरात आणखी दोघांना या आजाराची लागण झाली असून या आजाराच्या रुग्णांची संख्या १२२ वर पोहचली आहे. तर उपचारादरम्यान त्यातील दगावलेल्यांची संख्याही आता १९ झाली आहे. तर डेंग्यूचा आकडा ५१२ वर पोहचला आहे. नुकतेच न्यू ईरा रुग्णालयात परमजीतसिंग तुली यांचा मृत्यू झाल्याची नोंद महापालिकेच्या आरोग्य विभागाकडून केली गेली आहे.