जेट एअरवेजचा निर्णय; तिकीटाचे दर कमी होणार
म.टा. प्रतिनिधी, नागपूर
इकॉनॉमी क्लासमध्ये देशांतर्गत प्रवास करणाऱ्या प्रवाशांना नि:शुल्क भोजन देण्याची सेवा बंद करण्याचा महत्त्वपूर्ण निर्णय जेट एअरवेजने घेतला आहे. गेल्या काही महिन्यांपासून आर्थिक डबघाईमध्ये असलेल्या या कंपनीने अधिकाधिक महसूल मिळविण्यासाठी भोजन सेवा बंद करून तिकीट दर घसरविण्याचा निर्णय घेतला आहे. हा निर्णय येत्या २५ सप्टेंबरपासून लागू होणार आहे.
आर्थिकदृष्ट्या कमकुवत झालेल्या जेट एअरवेज या कंपनीने सध्या आर्थिक नफा कमविण्यासाठी नवनवीन फंडे आखले आहेत. यामध्ये नि:शुल्क भोजन न देण्याच्या निर्णयाचादेखील समावेश आहे. यामुळे येत्या काळात इकॉनॉमी क्लासमध्ये प्रवास करणाऱ्यांना केवळ चहा, कॉफी आणि बिस्किटे नि:शुल्क देण्यात येणार आहेत. जेटने घेतलेल्या निर्णयानुसार, देशांतर्गत यात्रांसाठी 'इकॉनॉमी डील' आणि 'इकॉनॉमी लाइट' असे दोन वर्ग केले आहेत. या दोन्ही वर्गांना हा निर्णय लागू होणार आहे. जेट एअरवेजने दोन वर्षांपूर्वी 'फेअर चॉइस' ही सुविधा सुरू केली होती. ज्याअंतर्गत प्रवासी आपल्या यात्रेच्या गरजेप्रमाणे फेअर स्कीम निवडू शकायचे. यानंतर कंपनीने घेतलेला हा दुसरा महत्त्वपूर्ण निर्णय समजला जात आहे. मात्र, हा निर्णय केवळ देशांतर्गत प्रवाशांसाठी लागू करण्यात आला आहे. आंतरराष्ट्रीय यात्रा करणाऱ्या प्रवाशांना हा निर्णय लागू होणार नाही.
इकॉनॉमी क्लामध्ये आंतररष्ट्रीय प्रवास करणाऱ्यांना नि:शुल्क भोजनाची सुविधा कायम राहणार आहे. येत्या २५ सप्टेंबरपासून तिकीट बुक करणाऱ्या प्रवाशांना हा निर्णय लागू होणार असून त्याची अंमलबजावणी २८ सप्टेंबरपासून होणार आहे.
यामुळे घेतला निर्णय
भोजनासाठी लागणारे शुल्क साधारणत: तिकीटच्या शुल्कामध्ये समाविष्ट असते. पण, कंपनीवर येत असलेला आर्थिक बोझा लक्षात घेत कंपनीने तिकिटामध्ये भोजनशुल्क समाविष्ट न करण्याचा निर्णय घेतला. प्राप्त माहितीनुसार, कंपनी सध्या २३०० कोटी रुपयांनी तोट्यात आहे. या आर्थिक संकटातून सावरण्यासाठी तिकीटामध्ये भोजन समाविष्ट न करता स्वतंत्ररित्या भोजन घेण्याचा निर्णय कंपनीने घेतला आहे.