म. टा. प्रतिनिधी, नागपूर
अंधारात एका वृद्धाला लुटण्यासाठी सरसावलेल्या दोघांपैकी एकाला वृद्ध माजी सैनिकाने पकडले. ही घटना जुनी कामठी पोलिस ठाण्यांतर्गत बौद्ध भूमी परिसरात गुरुवारी रात्री ८.३० च्या सुमारास घडली. शेख अकरम शेख काशीम (४०) रा. यादवनगर असे अटक करण्यात आलेल्या आरोपीचे नाव आहे. तर पळून जाण्यात यशस्वी झालेल्या त्याचा सरफराज नावाच्या साथीदाराला यशोधरानगर पोलिसांनी ताब्यात घेतल्याची माहिती आहे.
अरुण शिवअप्पा मोरचापुरे (६३) रा. शिवकृपानगर, भिलगाव असे फिर्यादीचे नाव आहे. ते लष्करातून सेवानिवृत्त झाले आहेत. रात्री ८.३० च्या सुमारास ते बौद्ध भूमी परिसरातील पेट्रोल पंपावरून आपल्या मोपेडमध्ये पेट्रोल भरून निघाले. घरी जात असताना काही अंतरावर अंधारात दोन तरुणांनी दुचाकीने त्यांचा पाठलाग केला. त्यांना अडवले. एकाने त्यांच्याकडे पैशांची मागणी केली. पैसे नसल्याने गळयातील सोनसाखळी हिसकावण्याचा प्रयत्न केला. तर दुसरा दुचाकीवर बसून असल्याने अरुण यांनी त्यांच्या दुचाकीला लाथ मारली. दुचाकी एकाच्या पायावर पडली. तर सोनसाखळी हिसकावण्याचा प्रयत्न करीत असलेल्यासोबत त्यांची झटापट सुरू होती. शेवटी परिसरात जाणारे-येणारे लोक गोळा व्हायला लागल्याने दुसऱ्याने त्यांची सोनसाखळी सोडून पळ काढला.
दरम्यान, परिसरात पेट्रोलिंग करणारे जुनी कामठीचे पोलिसही पोहोचले. तोपर्यंत अरुण व लोकांनी शेख अकरम याला ताब्यात घेऊन चांगलेच चोपले होते. त्याला पोलिसांच्या हवाली करण्यात आले. पोलिसांनी गुन्हा दाखल करून आरोपीला अटक केली व दुचाकी जप्त केली. त्याचा साथीदार सरफराज याच्याविरुद्ध अनेक गुन्हे दाखल करून त्याला यशोधरानगर पोलिसांनी अटक केल्याची माहिती आहे. त्याने रात्रीच्या सुमारास कामठी मार्गावरील एकाचे पाकिट मारून कामठीकडे पळाले होते. पण, माजी सैनिकाच्या साहसामुळे त्यांना पकडण्यात यश आले.
....
क्षुल्लक कारणावरून दोन गटांत मारहाण
नागपूर : जुन्या वादातून दोन गटांत मारहाण झाल्याची घटना समोर आली आहे. बुधवारी रात्री १० वाजता जरीपटका पोलिस ठाण्याच्या हद्दीतील श्रावस्तीनगर येथे ही घटना घडली. अमोल आनंद खंडाळे (२९) आणि बादल ताराचंद पौनिपगार यांच्याशी वाद होता. अमोलने आपला मुलगा सौम्याला मारहाण केल्याचा आरोप बादलने लावला आहे. तर बादलने त्याचे मित्र मुकेश आणि सचिन यांच्यासोबत आपल्यावर आणि आपल्या चुलत भावांनवर सशस्त्र हल्ला केल्याचा आरोप लावला आहे. बादलने आपल्याला मारहाण करून आपला पाय फ्रॅक्चर केला. तसेच आपले दोन चुलत भाऊ गौतम व योगेश यांनाही मारहाण केली, असा आरोप अमोलने केला आहे. याउलट अमोल आणि त्याच्या सहकाऱ्यांनी आपल्यावर हल्ला केल्याचा आरोप बादलने केला आहे. अमोलने आपला मुलगा सौम्याला मारहाण केली. याचा जाब विचारण्यासाठी आपण अमोलच्या घरी गेलो होतो. यावेळी अमोल, आकाश खंडारे, गौतम खंडारे आणि योगेश खंडारे यांनी आपल्यावर सशस्त्र हल्ला केल्याचा आरोप बादलने केला आहे. या प्रकरणी पोलिसांनी दोन्ही पक्षांवर गुन्हे दाखल केले आहेत.
....
प्रेयसीचे फोटो व्हायरल
नागपूर : ब्रेकअपनंतर प्रेयसीचे फोटो व्हायरल केल्याच्या आरोपाखाली एका तरुणावर गुन्हा दाखल करण्यात आला आहे. ही घटना गिट्टीखदान पोलिस ठाण्याच्या हद्दीत समोर आली आहे. राज जजसिंग असे या प्रकरणातील आरोपीचे नाव आहे. या प्रकरणातील पीडित तरुणीचे राजसोबत प्रेमसंबंध होते. मात्र राजचे अन्य मुलींसोबतसुद्धा प्रेमसंबंध असल्याचे या तरुणीच्या लक्षात आले. त्यामुळे तिने ब्रेकअपचा निर्णय घेतला. परंतु राज तिला त्यानंतर त्रास देऊ लागला. त्याने तिच्या नावाने इन्स्ट्राग्रामवर खोटे प्रोफाइल तयार करून त्यावर तिचे फोटो टाकले. याप्रकरणी या तरुणीने दिलेल्या तक्रारीच्या आधारावर पोलिसांनी राजवर विविध कलमांतर्गत गुन्हे दाखल केले आहेत.
.....
विद्यार्थिनीचा विनयभंग
नागपूर : नागपुरात वसतिगृहात राहत असलेल्या एका तरुणीचा तिच्या जुन्या मित्राने विनयभंग केल्याची घटना समोर आली आहे. या प्रकाराला १८ ऑक्टोबर २०१८ पासून सुरुवात झाली. हेमंत नंदन ठाकूर असे या प्रकरणातील आरोपीचे नाव असून तो वर्धा येथील रहिवासी आहे. ही तरुणीसुद्धा वर्ध्यातील रहिवासी आहे. ही तरुणी शिक्षणासाठी वर्ध्याहून नागपुरात आली. ती येथे शिक्षण घेणे आणि एका वसतिगृहात राहते. हेमंत हा तिचा परिचीत असून, जुना मित्र आहे. तो तिला भेटण्यासाठी नागपुरात आला. त्याने तिला अंबाझरी गार्डन येथे बोलाविले आणि तिचा विनयभंग केला. हा प्रकार गेल्या काही महिन्यांपासून सुरू असल्याची तक्रार या तरुणीने केली आहे. या प्रकरणी पोलिसांनी आरोपीवर गुन्हा दाखल करून तपास सुरू केला आहे. याखेरीज हुडकेश्वर पोलिस ठाण्याच्या हद्दीतील एका २५ वर्षीय तरुणीचा तिच्या वस्तीतील एका तरुणाने विनयभंग केल्याची घटना समोर आली आहे. गौरव भारती (२७) असे या प्रकरणातील आरोपीचे नाव आहे. त्याने या तरुणीच्या घरात शिरून तिला विनयभंग केल्याचा आरोप त्याच्यावर लावण्यात आला आहे.
..............