म. टा. वृत्तसेवा, गडचिरोली
सातारा जिल्ह्यातील कराड येथील शालेय राज्यस्तरीय मैदानी क्रीडा स्पर्धेत हेमलकसाच्या लोकबिरादरी प्रकल्पातील मुलीने सुवर्ण आणि कांस्यपदक पटकावले. गडचिरोली हा मागास जिल्हा, सोयीसुविधांचा अभाव असतानाही या मुलींनी मिळविलेले यश चमकदार ठरले आहे.
स्पर्धेसाठी लोकबिरादरी प्रकल्पातून सात मुलींची चमू पाठविण्यात आली होती. यात १८ वर्षे वयोगटातील मुलींसाठीच्या भालाफेक स्पर्धेत मीना महारू उसेंडीने ३३.६९ मीटर भाला फेकला. १८ मुलींमधून पहिला क्रमांक पटकावत सुर्णपदक मिळविले. मीना ही लोकबिरादरी प्रकल्पाच्या कनिष्ट महाविद्यालयात अकरावीत शिकत आहे. ही मूळची पोटनखुंडी या अतिदुर्गम गावातील रहिवासी आहे. याच स्पर्धेत सपना चमरू वेलदा या मुलीने ३००० मीटर धावण्याच्या स्पर्धेत तिसरे कांस्यपदक प्राप्त केले. अवघ्या ११ मिनीट १३ सेकंदात हे अंतर कापले. सपना ही हलवेर या अतिदुर्गम गावची रहिवासी आहे. या विजेत्या मुलींना क्रीडा प्रशिक्षक विवेक दुबे आणि समीक्षा अनिकेत आमटे यांनी मार्गदर्शन केले आहे. लोकबिरादरी प्रकल्पातील या मुलींचे हे यश दिशादर्शक असल्याचे ज्येष्ठ सामाजिक कार्यकर्ते डॉ. प्रकाश आणि डॉ. मंदा आमटे यांनी म्हटले आहे.