-खुल्या पोत्यात ठेवून आरोपीचे पलायन
म.टा. वृत्तसेवा, गोंदिया
घटेगाव येथील जिल्हा परिषद प्राथमिक शाळेत दुसऱ्या वर्गात शिकत असलेला रौनक गोपाल वैद्य या सात वर्षिय विद्यार्थ्याचे बुधवारी दुपारी ३ वाजताच्या सुमारास शाळेतून अपहरण झाल्याने जिल्ह्यात खळबळ उडाली होती. दरम्यान, रौनक हा देवरी तालुक्यातील पुतळी येथे आढळून आल्याची माहिती मिळताच पोलिसांनी घटनास्थळ गाठून मुलाला ताब्यात घेत त्याला आईवडिलाकंडे सुपूर्द केले. अपहरण झाल्याची माहिती मिळताच या मुलाच्या शोधासाठी पोलिसांनी जिल्ह्यात नाकाबंदीसह वाहनांची तपासणी करीत शोधोमोहीम राबविली होती.
बुधवारी दुपारच्या सुटीदरम्यान रौनक हा आपल्या मित्रांसोबत खेळत होता. यावेळी पांढऱ्या रंगाच्या स्कूटीस्वाराने रौनकला आपल्या गाडीवर बसवून नेत त्याचे अपहरण केले. या घटनेची माहिती मिळताच पालकांनी डुग्गीपार पोलिस ठाणे गाठून तक्रार नोंदविली. त्यानंतर पोलिसांनी तत्परतेने तपासकार्याला सुरुवात केली. पोलीस अधीक्षक विनिता साहू व अतिरिक्त पोलिस अधीक्षक संदीप आटोळे यांच्या मार्गदर्शनात तपासासाठी पथके तयार करून जिल्ह्यात नाकाबंदी करून वाहनांची तपासणी सुरू करण्यात आली. दरम्यान, गुरुवारी सकाळच्या सुमारास रौनकला आरोपीने 'तुला तुझ्या घरी सोडून देतो', असे सांगून त्याला पोत्यात भरले. त्यानंतर त्याला देवरी तालुक्यातील पुतळी येथील तलावाच्या पाळीजवळ पोते खुले करून ठेवत आरोपींनी पोबारा केला. रौनकने पोत्यातून बाहेर येत रस्त्याने येणाऱ्या एका इसमाला थांबवले. त्या इसमाने पुतळी येथील सरपंचांना याबाबत माहिती देताच सरपंच व पोलिस पाटलांनी देवरी पोलिसांना माहिती देत रौनकला त्यांच्या स्वाधीन केले. देवरी पोलिसांनी मुलाची वैद्यकीय तपासणी केली असून त्याची प्रकृती व्यवस्थीत आहे. रौनकला कुठलीही इजा झालेली नसल्याची माहिती डुग्गीपारचे पोलिस निरीक्षक विजय पवार यांनी दिली. सदर प्रकरणातील आरोपी फरार झाले असून पोलिस अधीक्षक विनिता साहू यांनी देवरी येथील उपमुख्यालयात उपस्थित राहून यासंदर्भातील घटनेचा आढावा घेतला.