बीकॉमच्या चुकीच्या प्रश्नांचे मिळणार गुण

नागपूर : राष्ट्रसंत तुकडोजी महाराज नागपूर विद्यपीठाच्या बीकॉम अंतिम वर्षाच्या फायनान्शिअल अकाउंट या पेपरमध्ये झालेल्या चुकांबाबत वाणिज्य अधिष्ठाता डॉ. विनायक देशपांडे यांच्या अध्यक्षतेखालील समितीची गुरुवारी बैठक घेण्यात आली. ज्या विद्यार्थ्यांनी चुकीचे प्रश्न सोडवण्याचा प्रयत्न केला आहे, त्यांनाच गुण मिळणार आहे. त्यातही किती प्रश्न सोडवले, त्यावर गुणदान निश्चित होणार आहे. त्यामुळे सरसकट गुणदान करण्याऐवजी विद्यापीठाने मध्यम मार्ग काढला आहे. बीकॉम अंतिम वर्षाचा फायनान्शिअल अकाउंट या विषयाचा पेपर आठ दिवसांपूर्वी घेण्यात आला होता. त्या पेपरमध्ये तब्बल तीन प्रश्न चुकीचे होते, असा दावा विद्यार्थ्यांनी केला. त्यामुळे किमान ६० गुणांचे नुकसान होणार असल्याने विद्यापीठाने त्यावर तातडीने कारवाई करावी, अशी मागणी करीत एनएसयुआयच्या नेतृत्वात विद्यार्थी विद्यापीठात आले. विद्यार्थ्यांनी दिलेल्या माहितीनुसार, पेपरमधील प्रश्न क्रमांक सी- ३ सी आणि सी-५ हे चुकीचे होते. या प्रश्नांत देण्यात आलेल्या आकडेवारीमुळे विद्यार्थ्यांचा गोंधळ उडाला. त्यामुळे प्रश्नपत्रिका तयार करणाऱ्यांवर कारवाई करावी, विद्यार्थ्यांना चुकीच्या प्रश्नांकरिता गुणदान द्यावे, अशी मागणी करण्यात आली. विद्यार्थ्यांच्या तक्रारीवर वाणिज्य अधिष्ठात्यांनी तातडीने या मुद्द्यावर बैठक घेतली. त्या बैठकीत विद्यार्थ्यांच्या मागणीवर विचार करण्यात आला. तसेच प्रश्नपत्रिका तपासण्यात आली तेव्हा दोनच प्रश्नांमध्ये चुका होत्या. तर तिसऱ्या प्रश्नात किरकोळ चूक होती. त्या दोन प्रश्नांकरिता फेरपरीक्षा घेणे अयोग्य ठरेल, असे समितीने स्पष्ट केले. त्यामुळे विद्यार्थ्यांनी प्रश्न सोडवण्याचा प्रयत्न केला त्यांना थेट २० गुण देण्याऐवजी त्यांनी लिहिलेल्या उत्तराच्या अनुपातात गुण देण्यात येणार आहे.