पोलिस महासंचालक व मुख्य सचिवांनी घेतला आढावा
- गडचिरोलीच्या सुरक्षेसह विकासावर सरकारचे लक्ष
गडचिरोली : राज्याचे पोलिस महासंचालक दत्ता पडसलगीकर यांनी राज्याच्या मुख्य सचिव डी.के.जैन यांच्यासह शनिवारी गडचिरोलीचा दौरा केला. या दौऱ्यात पडसलगीकर यांनी अतिसंवेदनशील भागात भेट देऊन कर्मचाऱ्यांशी संवाद साधून आढावा घेतला. राज्याच्या या दोन वरिष्ठ अधिकाऱ्यांच्या दौऱ्याने येणाऱ्या काळात सुरक्षेसह विकासावर सरकारचे लक्ष केंद्रीत राहणार असल्याचे संकेत मिळाले आहेत.
राज्याचे पोलीस महासंचालकपदाची सुत्रे हाती घेतल्यानंतर महासंचालक दत्ता पडसलगीकर यांनी नक्षलप्रभावीत गडचिरोली जिल्हयाचा पहिला दौरा केला. या दौऱ्यात राज्याचे मुख्य सचिव डी. के. जैन, राज्याचे अतिरिक्त गृह सचिव सुनिल पोरवाल हे सोबत होते. अतिसंवेदनशील येरकड येथील उपपोलिस ठाण्याला भेट देऊन पाहणी केली. त्या ठिकाणी असलेल्या जवानाशी संवाद साधून समस्या लवकरच सोडवण्याचे आश्वासन देऊन जवानांचे मनोधैर्य वाढविले. त्यानंतर गडचिरोलीत पोलिस अधीक्षक कार्यालयात शहीद स्मारकाला मानवंदना देऊन शहीद पोलिसांना सलामी दिली. त्या ठिकाणी माओवादविरोधी मोहीमेत चांगली कामगिरी केलेल्या बारा अधिकारी आणि जवानांना पोलीस महासंचालक सन्मानचिन्ह देऊन महासंचालकांनी गौरव केला. अलीकडच्या भामरागड चकमकीत चांगली कामगिरी करणाऱ्या जवानांचे महासंचालकांनी अभिनंदन केले. जिल्हाधिकारी कार्यालयात माओवाद्यांच्या कारवायासह कायदा सुव्यवस्थेवर विशेष आढावा बैठक पार पडली. या बैठकीत अतिसंवेदनशील भागात रखडलेल्या रस्त्यांच्या बांधकामाची अवस्था, पोलिस विभागाच्या भरतीत स्थानिक तरुणांना प्राधान्य देण्यासह सुरजागड पहाडावरील उत्खननासंदर्भात येणाऱ्या अडचणी, नवीन मोबाईल टावरचे बांधकामावर महासंचालक पडसलगीकर, राज्याचे मुख्य सचिव जैन यांनी विशेष आढावा घेतला. या बैठकीला अतिरिक्त महासंचालक कनकरत्नम, पोलिस महानिरीक्षक शेलार, डीआयजी अंकुश शिंदे, जिल्हाधिकारी शेखरसिंग, पोलिस अधीक्षक डॉ. अभिनव देशमुख उपस्थित होते.
-------------------------------