म. टा. विशेष प्रतिनिधी, नागपूर
शहरातील बहुतांश वर्दळीच्या रस्त्यांचे सिमेंटीकरण होत असताना वस्त्यांमधील रस्तेही चकाचक होत आहे. गेल्या काही दिवसांपासून नागपूरकरांना याचा अनुभव येत आहे. वस्त्यांमधील अनेक रस्त्यांचे डांबरीकरण होत आहे. निवडणुकीपूर्वी स्थायी समितीने या रस्त्यांना मंजुरी प्रदान केली होती. या कामांना कार्यादेशही निवडणुकीपूर्वीच मिळाल्यानंतर आता रस्त्यांची कामे होत आहे.
शहरातील अनेक भागात असलेल्या वस्त्यांमध्ये रस्त्यांच्या डांबरीकरणाचे काम झाले नव्हते. गेल्या तीन वर्षांपासून मनपाची आर्थिक स्थिती अडचणीची असल्याने रस्त्यांच्या कामाला मंजुरी मिळत नव्हती. त्यानंतर यंदा राज्य शासनाने अनुदानाच्या स्वरूपात मोठा निधी दिल्याने रस्ते कामाच्या फाइल मोठ्या संख्येत मंजुरीला आल्या होत्या. नगरसेवकांनीही प्रभागातील विकासकामात नवीन रस्ते व डांबरीकरण करण्याचे प्रस्ताव मोठ्या संख्येत स्थायी समितीसमोर आणले होते. विशेषत: रस्ते डांबरीकरणाच्या प्रत्येक नगरसेवकांच्या ५० ते ८० लाखांच्या फाइल्स होत्या. वस्त्यांमधील कामे करताना रस्त्यांची दुरुस्ती हीच मोठी तक्रार आहे. शिवाय, निवडणुकीचा काळ असल्याने रस्ते चकाचक झाल्यास नगरसेवकांनाही प्रभागातील नागरिकांना तोंड द्यायला सोपे असते. त्यामुळे रस्ते डांबरीकरणाचे प्रस्ताव मोठ्या संख्येत आले. स्थायी समितीनेही याच प्रस्तावांना प्राधान्य देत मंजुरी प्रदान केली. जवळपास २५ ते ७० कोटींच्या रस्त्यांच्या डांबरीकरणाच्या कामास मंजुरी दिल्याची माहिती सूत्रांनी दिली. परिणामी, शहरभर अनेक भागांत रस्त्यांची कामे होत आहे. चकाचक रस्त्यांमुळे नागरिकांनाही थोडा दिलासा मिळाला आहे. परंतु, फार उशिराने काम होत असल्याची नाराजीही नागरिकांनी व्यक्त केली आहे.
दरम्यान, वस्त्यांमधील रस्त्यांच्या डांबरीकरणासोबत वाहतुकीची वर्दळ असलेल्या रस्त्यांवर पडलेल्या खड्ड्यांवरही ठिगळ लावण्याचे काम सुरू आहे. अनेक डांबर रस्ते अनेक ठिकाणी खड्डयांमुळे खराब झालेले आहेत. अशा रस्त्यांना ठिगळ लावून दुरूस्तीचे कामही सुरू आहेत. त्यामुळे ऐन निवडणुकीच्या काळात एकीकडे नागरिकांना दिलासा मिळत आहे. दुसरीकडे आताच दुरूस्ती होत असल्याबद्दल विविध तर्कवितर्कही काढले जात आहे.
.......