अमरावती : शहरात सातत्याने होणाऱ्या दुचाकी चोरीचा छडा लावत पोलिसांनी चोरट्यांकडून दहा दुचाकी जप्त केल्या आहेत. ही कारवाई गुन्हे शाखेच्या पथकाने केली. दुचाकी चोरीप्रकरणी पोलिसांनी ७ जून रोजी सय्यद राशीद सय्यद नूर (वय १९, रा. पठाण चौक) याला ताब्यात घेतले होते. पोलिसी हिसका दाखवून त्याची चौकशी केली असता त्याच्याजवळ असलेली दुचाकी (एमएच ३७ डी २९८०) ही त्याने शुक्रवारी बाजार चपराशीपुरा येथून चोरल्याचे सांगितले. त्याच्यावर गुन्हा दाखल करून त्यास अटक करण्यात आली. चोरीच्या गुन्ह्यात त्याला शेख इम्रान शेख रहमान यानेदेखील सहकार्य केल्याचे उघड झाले. शेख इम्रान हा पसार आहे. यानंतर पोलिस आयुक्तालयाच्या हद्दीतील बडनेरा येथून दोन, फ्रेजरपुरा येथून एक, कोतवाली येथून तीन, नागपुरी गेट येथून एक, भातकुली पोलिस ठाण्याच्या हद्दीतून एक मोटारसायकल चोरल्याचे त्याने कबूल केले. पोलिसांनी सर्व दुचाकी जप्त केल्या आहेत. याप्रकरणातील आरोपी शेख इम्रान शेख रहमान हा पसार आहे. आरोपीची सखोल चौकशी सुरू असून आणखी दुचाकी जप्त करण्यात येणार असल्याचे पोलिसांनी म्हटले आहे. ही कारवाई गुन्हे शाखेचे निरीक्षक प्रमेश आत्राम यांच्या मार्गदर्शनात गुन्हे शाखेच्या पथकाने केली.
चोरीच्या दहा दुचाकी जप्त
शहरात सातत्याने होणाऱ्या दुचाकी चोरीचा छडा लावत पोलिसांनी चोरट्यांकडून दहा दुचाकी जप्त केल्या आहेत ही कारवाई गुन्हे शाखेच्या पथकाने केली...
Maharashtra Times 13 Jun 2018, 4:00 am