सरकार आजपासून शहरात
म.टा. विशेष प्रतिनिधी, नागपूर
राज्य विधिमंडळाच्या हिवाळी अधिवेशनाच्या पूर्वसंध्येला मुख्यमंत्र्यांच्या परंपरागत चहापानावर बहिष्कार टाकण्याची परंपरा कायम राखण्याचे संकेत भाजपने दिले आहेत. सरकारला घेरण्याची रणनीती आखण्याबाबत पक्षाची आज, रविवारी दुपारी १२ वाजता रविभवनातील विरोधी पक्षनेत्यांच्या कॉटेजमध्ये बैठक होणार आहे. दरम्यान, मुख्यमंत्री उद्धव ठाकरे यांच्यासह मंत्रिमंडळातील काही सदस्यांचे रविवारी सकाळपासून आगमन होणार आहे. उद्या, सोमवारपासून अधिवेशनानिमित्त येत्या आठवडाभर सरकारचा उपराजधानीत मुक्काम राहील.
मुख्यमंत्री उद्धव ठाकरे यांनी फडणवीस सरकारच्या कार्यकाळातील प्रकल्पांचा आढावा घेण्यासोबतच विविध कामांना स्थगिती देण्याचा सपाटा लावला आहे. भाजपकडून विविध पातळ्यांवर याचा विरोध केला जात आहे. या पार्श्वभूमीवर मुख्यमंत्र्यांच्या चहापानाला जाऊ नये, अशी भूमिका बहुतांश सदस्यांनी घेतली आहे. यासंदर्भात विरोधी पक्षनेते देवेंद्र फडणवीस व भाजप प्रदेशाध्यक्ष चंद्रकांत पाटील यांच्या उपस्थितीत प्रमुख नेत्यांची दुपारी १२ वाजता रविभवनातील कॉटेजमध्ये बैठक होणार आहे. यात अधिवेशनात उपस्थित करण्यात येणाऱ्या विविध मुद्द्यांसह चहापानाच्या बहिष्काराबाबत चर्चा करण्यात येणार असल्याची माहिती सूत्रांनी दिली.
नागपुरातील हिवाळी अधिवेशनाच्या पूर्वसंध्येला राज्याचे मुख्यमंत्र्यांची विरोधी पक्षनेत्यांसोबत चहापानाची परंपरा आहे. तथापि, यापूर्वीचे एखाद-दोन अपवाद वगळता विरोधी पक्षाकडून चहापानावर बहिष्कार टाकण्यात येतो. राज्यातील शेतकरी अवकाळी पावसामुळे संकटात आले आहेत. राज्य सरकारने आतापर्यंत जाहीर केलेली १५ हजार कोटी रुपयांची मदत अद्याप शेतकऱ्यांपर्यंत पोहोचलेली नाही. स्थानिक पातळीवरील विकासकामांचा फडणवीस सरकारने घेतलेला निर्णय ठाकरे सरकारने ५ डिसेंबर रोजी आदेश जारी करून स्थगिती दिली. समृद्धी महामार्ग असो नाही तर अन्य प्रकल्प, विविध कामांचा आढावा घेण्यात येत आहे. हे मुद्देही विरोधी पक्षाकडून मांडले जाण्याची शक्यता आहे.
मुख्यमंत्र्यांचे आज आमगन
मुख्यमंत्री उद्धव ठाकरे यांचे आज, रविवारी दुपारी २ वाजता आगमन होणार आहे. सायंकाळी ५ वाजता विरोधी पक्ष नेत्यांसोबत चहापान आयोजित करण्यात आले आहे. यानंतर मंत्रिमंडळाची बैठक होईल. मंत्री छगन भुजबळ यांचे शनिवारी रात्री उशिरा येथे आगमन झाले. अन्य मंत्री दिल्ली व मुंबईहून येणार आहेत. विरोधी पक्षनेते देवेंद्र फडणवीस यांचेही रात्री आगमन झाले.