- स्वयंअध्ययन अहवालच तयार नाही
म.टा. विशेष प्रतिनिधी, नागपूर
राष्ट्रसंत तुकडोजी महाराज नागपूर विद्यापीठाने राष्ट्रीय अधीस्वीकृती व मानांकन परिषदेच्या मूल्यमापनाची तयारी सुरू केलेली आहे. परंतु, अद्याप विद्यापीठाचा स्वयंअध्ययन अहवाल तयार झालेला नसल्याने नॅक समितीचा दौरा लांबण्याची शक्यता आहे.
नागपूर विद्यापीठाला डिसेंबर २०१९पर्यंत नॅकचा 'अ' श्रेणी दर्जा मिळाला होता. त्यापूर्वी नव्या मूल्यमापनाकरिता नॅकला प्रस्ताव पाठवणे आवश्यक आहे. त्यासाठी विद्यापीठाला आधी स्वयंअध्ययन अहवाल तयार करणे गरजेचे आहे. तत्कालीन कुलगुरू व विभागीय आयुक्त अनुपकुमार यांच्या कार्यकाळात नॅक मूल्यांकन झाले होते. तेव्हा विद्यापीठाला 'अ' श्रेणी दर्जा मिळाला होता. परंतु, सदर दर्जा बहाल करीत असतानाच नॅकने काही मुद्यांवर बोट ठेवले होते.
दरम्यान, विद्यमान कुलगुरू डॉ. काणे यांचा कार्यकाळ ७ एप्रिल रोजी संपत आहे. त्यापूर्वी नॅक मूल्यांकन करण्याचा प्रयत्न विद्यापीठाकडून करण्यात येत होते. मात्र, अद्याप स्वयंअध्ययन अहवालच नॅककडे पाठवण्यात आलेला नाही. त्यामुळे अहवाल सादर झाल्यानंतर समिती प्रत्यक्ष विद्यापीठात येण्यासाठी किमान तीन ते चार महिन्यांचा कालावधी लागणार आहे. त्यामुळे डॉ. काणे यांच्या कार्यकाळात नॅक फेरमूल्यांकन होईल की नाही, याबाबत शंका उपस्थित करण्यात येत आहे.
विद्यापीठाला ३१ डिसेंबरच्या आत स्वयंअध्ययन अहवाल नॅकला सादर करणे आवश्यक होते. परंतु, अहवाल तयार होत असतानाच नॅकने अहवालासाठीचे निकष बदलले. त्यामुळे विद्यापीठ प्रशासनाला नव्याने माहिती गोळा करावी लागली. त्यातच काही विभागांकडून माहिती मिळत नव्हती. त्यास्थितीत कोणत्याही स्थितीत १५ फेब्रुवारीपर्यंत स्वयंअध्ययन अहवाल तयार करावा, असा अल्टीमेटम कुलगुरू डॉ. सिद्धार्थविनायक काणे यांनी आयक्यूएससीच्या संचालिका डॉ. स्नेहा देशपांडे यांना दिला होता. परंतु, निर्धारित मुदत दिल्यानंतरही अहवाल तयार झाला नाही. त्यास्थितीत मार्च अखेरपर्यंतच आता अहवाल सादर होण्याची शक्यता आहे. विद्यापीठाचे प्रशासन व शैक्षणिक विभाग अहवाल तयार करण्यासाठी जोरकस प्रयत्न करीत आहे, असे प्र-कुलगुरू डॉ. विनायक देशपांडे यांनी नमूद केले.
दरम्यान, कुलगुरू डॉ. काणे यांच्या कार्यकाळात झालेल्या शैक्षणिक व पायाभूत विकासाची माहिती या अहवालात नमूद करण्यात आली आहे. त्यामुळे नॅक समितीला योग्य प्रकारे माहिती देणे व प्रेझेंटेशन देण्याची इच्छा कुलगुरू डॉ. काणे यांना होती. परंतु, त्यांच्या कार्यकाळात नॅक समिती विद्यापीठाला भेट देईल, अशी शक्यता आता मावळली आहे. त्यास्थितीत नव्या कुलगुरूंकडेच ही जबाबदारी येणार असल्याचे दिसून येते.