विद्यापीठाची ‘नॅक’ तयारी संथगतीने
म टा...
म. टा. विशेष प्रतिनिधी, नागपूर
राष्ट्रसंत तुकडोजी महाराज नागपूर विद्यापीठाने राष्ट्रीय अधिस्वीकृती व मानांकन परिषदेच्या मूल्यमापनाची तयारी सुरू केलेली आहे. परंतु, अद्याप विद्यापीठाचा स्वयंअध्ययन अहवाल तयार झालेला नसल्याने 'नॅक' समितीचा दौरा लांबण्याची शक्यता आहे.
नागपूर विद्यापीठाला डिसेंबर २०१९ पर्यंत 'नॅक'चा अ श्रेणी दर्जा मिळाला होता. त्यापूर्वी नव्या मूल्यमापनाकरिता नॅकला प्रस्ताव पाठवणे आवश्यक आहे. त्यासाठी विद्यापीठाला आधी स्वयंअध्ययन अहवाल तयार करणे गरजेचे आहे. तत्कालीन कुलगुरू व विभागीय आयुक्त अनुपकुमार यांच्या कार्यकाळात 'नॅक' मूल्यांकन झाले होते. तेव्हा विद्यापीठाला अ श्रेणी दर्जा मिळाला होता. परंतु, सदर दर्जा बहाल करीत असतानाच 'नॅक'ने काही मुद्यांवर बोट ठेवले होते.
नागपूर विद्यापीठात अद्यापही नियमित प्राध्यापकांची पदे रिक्त आहेत. तसेच विद्यार्थी संख्या वाढत असली तरीही शिक्षकेतर कर्मचाऱ्यांची पदे कमी होत आहेत. त्यामुळे विद्यापीठाच्या एकूणच संशोधन व प्रशासकीय यंत्रणेवर प्रचंड ताण पडला आहे. राज्य सरकारने विद्यापीठातील प्राध्यापकांची रिक्त पदे भरण्याबाबत मंजुरी दिली असली तरीही मराठा आरक्षणामुळे अद्यापही आरक्षण बिंदुनामावली पूर्ण झालेली नाही. नॅक समितीच्या भेटीपूर्वी विद्यापीठातील प्राध्यापकांची पदे भरणे जवळपास अशक्य असल्याचे दिसून येते.
प्राध्यापकांच्या रिक्तपदांची अडचण दूर करण्यासाठी कुलगुरू डॉ. सिद्धार्थविनायक काणे यांनी कंत्राटी पद्धतीवर प्राध्यापक नियुक्त करण्याचा निर्णय घेतला. त्यामुळे या प्राध्यापकांच्या मार्फत केवळ अध्यापनच नव्हे तर परीक्षा व संशोधन यासारखी कार्येही करण्यात येत आहे. त्याची नोंद 'नॅक' समितीमार्फत होण्याची शक्यता आहे.
दरम्यान, विद्यमान कुलगुरू डॉ. काणे यांचा एप्रिल २०२० पर्यंतचा कार्यकाळ आहे. त्यापूर्वी 'नॅक' मूल्यांकन करण्याचा प्रयत्न विद्यापीठाकडून करण्यात येत आहे. मात्र, अद्याप स्वयंअध्ययन अहवालच 'नॅक'कडे पाठवण्यात आलेला नाही. त्यामुळे अहवाल सादर झाल्यानंतर समिती प्रत्यक्ष विद्यापीठात येण्यासाठी किमान ती ते चार महिन्यांचा कालावधी लागणार आहे. त्यामुळे डॉ. काणे यांच्या कार्यकाळात नॅक फेरमूल्यांकन होईल की नाही, याबाबत शंका उपस्थित करण्यात येत आहे.