म. टा. विशेष प्रतिनिधी,नागपूर
राष्ट्रसंत तुकडोजी महाराज नागपूर विद्यापीठाचे कुलगुरू डॉ. सिद्धार्थविनायक काणे डिसेंबर महिन्यात प्रदीर्घ रजेवर जात आहेत. त्यांच्या अनुपस्थितीत विद्यापीठाचा कार्यभार प्र कुलगुरू डॉ. प्रमोद येवले यांच्याकडे न देता अमरावती विद्यापीठाचे कुलगुरू डॉ. मुरलीधर चांदेकर यांच्याकडे सोपवण्याचे आदेश कुलपती कार्यालयाने दिले आहेत. सदर आदेशावर आश्चर्य व्यक्त करण्यात येत आहे.
कुलगुरू रजेवर गेल्यास प्र कुलगुरूंकडे कार्यभार सोपवण्याची तरतूद महाराष्ट्र सार्वजनिक विद्यापीठ कायद्यात देण्यात आली आहे. तसेच आजवरच्या प्रथेनुसार प्र कुलगुरूच कुलगुरूंच्या अनुपस्थितीत कार्यभार पाहत आले आहेत. यापूर्वी दोनदा कुलगुरू डॉ. काणे लंडनला गेले असताना त्यांच्या अनुपस्थितीत प्र कुलगुरू डॉ. प्रमोद येवले यांच्याकडेच कार्यभार सोपवण्यात आला होता. परंतु, यंदा डॉ. येवले यांच्याऐवजी अमरावती विद्यापीठाच्या कुलगुरूंकडून नागपूर विद्यापीठाची अतिरिक्त जबाबदारी सोपवण्याचे आदेश देण्यात आले आहेत. त्यामुळे सदर आदेशांवर विद्यापीठात आश्चर्य व्यक्त करण्यात येत आहे.
डॉ. काणे सहा डिसेंबर ते २९ डिसेंबर या कालावधीत लंडनला खाजगी दौऱ्यावर जात आहेत. त्यामुळे त्यांनी कुलपती कार्यालयाकडे सुटीचा अर्ज सादर केला. त्या अर्जाला कुलपती कार्यालयाने मंजुरीदेखील दिली. परंतु, त्यासोबतच सुटी कालावधीतील कुलगुरूपदाचा कार्यभार अमरावती विद्यापीठाच्या कुलगुरूंकडे सोपवण्यात यावा, असे लेखी आदेश देण्यात आले आहेत. प्र कुलगुरूंना डावलून अमरावतीच्या कुलगुरूंना कार्यभार सोपवण्यामागे कुलपती कार्यालयाने कोणतीही कारणे दिलेली नाहीत. परंतु, डॉ. येवले यांच्याविरोधात हायकोर्टात प्रलंबित असलेल्या याचिकेचा हा परिणाम असावा, अशी शक्यता वर्तवण्यात येत आहे. यासंदर्भात डॉ. काणे यांच्याशी संपर्क साधला असता त्यांनी त्यावर कोणतीही प्रतिक्रिया दिली नाही. तर प्र कुलगुरू डॉ. येवले यांच्याशी संपर्क होऊ शकला नाही. मात्र, अमरावती विद्यापीठाचे कुलगुरू डॉ. चांदेकर यांनी कुलपती कार्यालयाकडून लेखी आदेश प्राप्त झाले असल्याचे स्पष्ट केले. त्यात डॉ. काणे यांच्या सुटी कालावधीत नागपूर विद्यापीठाच्या कुलगुरू पदाचा अतिरिक्त कार्यभार स्वीकारायचा आहे, असे नमूद करण्यात आले आहे. डॉ. चांदेकर यांनी कुलपतींच्या निर्णयावर प्रतिक्रिया देण्यास नकार दिला.
........