सरन्यायाधीशांनी केलेल्या सूचनेनुषंगाने
शहरातील वकिलांच्या प्रतिक्रिया
म. टा. विशेष प्रतिनिधी, नागपूर
वकिलांना परिधान करावा लागणारा गाउन करोना विषाणूचा वाहक ठरू शकतो. त्यामुळे पुढील सूचनेपर्यंत हा गाउन अथवा कोट वापरू नये, अशा सूचना सरन्यायाधीश शरद बोबडे यांनी दिल्या आहेत. या निर्णयाचे नागपुरातील वकिलांनीही स्वागत केले आहे. विशेष म्हणजे नागपुरात ही खबरदारी घेतली जात आहे. शिवाय व्हिडीओ कॉन्फरन्सद्वारे होणाऱ्या सुनावणीतही वकील काळा कोट, गाउन टाळला जात आहे.
सर्वोच्च न्यायालयातील सर्व वकिलांनी सुनावणीदरम्यान केवळ स्वच्छ पांढरा शर्ट परिधान करावे. त्यावर पांढरा बॅण्ड लावावा, अशी सूचना सरन्यायाधीश शरद बोबडे यांनी दिली आहे. उच्च न्यायालयात येऊन युक्तिवाद करणारेच आता गाउन घालत आहेत. मात्र अशांची संख्या अगदीच बोटावर मोजण्याइतकी आहे. त्यांनाही आता सवलत मिळाली आहे. मे महिन्याच्या प्रचंड उष्णतेत कोट व गाउन घालून न्यायालयात येणे तसेही अडचणीचे आहे. त्यामुळे या ड्रेसकोडमध्ये करोनामुळे झालेली सुधारणा कायस्वरूपी करण्याची मागणीही होत आहे. ब्रिटिश राजवटीतील न्यायालयीन पद्धतीत वकिलांसाठी तयार करण्यात आलेला ड्रेसकोड स्वतंत्र भारतात का कायम ठेवावा, यावर गेल्या अनेक वर्षांपासून चर्चा सुरू आहे.
करोना विषाणूमुळे जगभरातील जीवनपद्धतीत आमूलाग्र बदल होत आहेत. हे बदल न्यायालयीन यंत्रणेतही दिसत आहेत. न्यायालयीन कामकाज व्हिडीओ कॉन्फरन्सने होईल काय, यावर चर्चा सुरू होती. ई-कोर्ट तयार करण्याचे काम सुरू झाले होते. पण करोनामुळे ही यंत्रणा तातडीने स्वीकारली गेली. न्यायमूर्ती व वकील याचिकांवर व्हिडीओ कॉन्फरन्सवर सुनावणी करीत आहेत. वकिलांच्या कार्यपद्धतीनही बदल झाला आहे.