मग गुन्हे कसे दाखल करणार - किशोर तिवारी
बियाणे विक्रेते,निर्माते आता आमदार,खासदार बनायला लागले
राज्य व केंद्र सरकारला घरचा आहेर
वर्धा - बोगस बियाणे विकून माया जमविणारे आता नगर पालिका, पंचायत समिती, जिल्हा परिषदमध्ये निवडून येत आहे. बियाणे निर्माते तर आमदार, खासदार होत आहे, काही राज्यसभेवर जात आहे. मग कारवाई कुणावर करायची, असा उलट प्रश्न करीत मी काय करू असा सवालही वसंतराव नाईक शेती स्वावलंबन मिशनचे अध्यक्ष किशोर तिवारी यांनी उपस्थित केला.
शेतकऱ्यांना पीककर्ज उपलब्ध करून देण्याच्या सूचना बँकांना देण्यात आल्यात. तरीही पीक कर्जाचा टक्का वाढतांना दिसत नाही . बँका शेतकऱ्यांना कर्ज देण्यासाठी उदासीन आहेत . अधिकाऱ्यांना शेतकऱ्यांची व्यथाच कळत नाहीत काय अशा शब्दात बँक अधिकाऱ्यांवरील रोष शेतकरी स्वावलंबन मिशनचे अध्यक्ष किशोर तिवारी यांनी व्यक्त केला .येथील शासकीय विश्रामगृहात आले असताना तिवारी'मटा'शी बोलत होते.
ऐन पोळ्याच्या दिवशी अधिकाऱ्यांची बैठक बोलावण्यात आली असल्याची चर्चा अधिकाऱ्यांमध्ये होती . त्यामुळे अधिकाऱ्यांमध्ये सुटीच्या दिवशी होणाऱ्या बैठकीविषयी नाराजीचा सूर होता . पण अधिकाऱ्यांची बैठक मात्र अमरावती येथेच घेण्यात आली. वर्ध्यात बैठक नसल्याचे किशोर तिवारी यांनी स्पष्ट केले . परंतु बँक अधिकाऱ्यांच्या कार्यशैलीवर त्यांनी प्रश्नचिन्ह निर्माण केले आहे . वर्ध्यात अग्रणी बँक असणाऱ्या बँक ऑफ इंडियाच्याच सर्वाधिक तक्रारी असल्याचे त्यांनी सांगितले . आधीच शेतकरी बोडंअळीने त्रस्त झाला आहे. कृषी कंपन्या आणि त्यांचे दलाल शेतकऱ्यांच्या जीवावर उठले आहेत . शेतकरी नागवला जात आहे . वर्ध्यात शेतकऱ्यांचे नेतेही शेतकऱ्यांची बाजू मांडायला सक्षम नाहीत . म्हणूनच शेतकऱ्यांच्या समस्या अजूनही वाढत आहेत . बँकेच्या चकरा मारून शेतकरी थकला आहे .सरकारचे पीककर्जाच्या बाबतीत दुर्लक्ष होतेय काय या प्रश्नाकडे त्यांचे लक्ष वेधले असता त्यांनी दुर्लक्ष होत नसल्याचे सांगत बँक प्रशासकीय यंत्रणेला जुमानत नसल्याचे सांगितले . सर्वत्र बँकेची मनमानी सुरु आहे . फेरोमन ट्रॅपणे बोंडअळीचे नियंत्रण शक्य आहे . शेतकरी त्यावर लक्ष देखील ठेऊन आहेत . त्यामुळे बोंड नियंत्रणात राहू शकते . पीकविमा कंपन्यांनी प्रामाणिकपणे शेतकऱ्यांच्या हिताचा विचार करायला पाहिजे असेही त्यांनी सांगितले . यावेळी आ. पंकज भोयर , मिलिंद भेंडे , प्रशांत तिगावकर , गुड्डू कावळे उपस्थित होते .
---------------------