पाहणीत आढळल्या अनेक त्रुट्या, बुधवारी झाली तपासणी
म. टा. प्रतिनिधी, नागपूर
मनपाच्या मुख्यालयात 'फायर अलार्म पॅनेल'च नसल्याचे उघडकीस आले आहे. पार्किंग परिसरात आग लागल्यानंतर आग प्रतिबंधक यंत्रणा लावण्यासह 'मेकॅनिकल व्हेंटीलेशन'ला जागा नसल्याची नोंदही आग व आपत्कालीन सेवा विभागाने ९ मे रोजी पाहणी केल्यानंतर घेतली आहे. आयुक्तांसह इतर वरिष्ठ अधिकाऱ्यांचे कार्यालय असलेल्या तळमजल्यावर अलार्म पॅनेल नव्हते. यावरून इमारतीच्या सुरक्षेबाबत पाळण्यात आलेल्या गंभीरता स्पष्ट होते.
नवे आयुक्त वीरेंद्र सिंह यांनी रूजू झाल्यानंतर त्यांनी इमारतीची पाहणी केली. त्यानंतर इमारतीचे 'फायर ऑडिट' करण्यात आले. मुख्य अग्निशमन अधिकारी राजेंद्र उचके यांनी कार्यकारी अभियंता (विद्युत) संजय जयस्वाल यांना तीन तासांची नोटीस बजावून महाराष्ट्र आग प्रतिबंधक आणि जीवसुरक्षा उपाय कायदा, २००६ अन्वये ही तपासणी करण्यात आली होती. हा अहवाल कार्यकरी अभियंता जयस्वाल यांना सोपविण्यात आला. यात महिन्याभरात इमारतीत आग प्रतिबंधक यंत्रणा लावण्याचे निर्देश देण्यात आले. या 'फायर ऑडिट' तपासणीत तळमजल्यावर असलेल्या अग्निशमन विभागाच्या परिसरातही काही त्रुट्या काढण्यात आल्या. याठिकाणी कंट्रोल रूम व आपत्कालीन कक्ष आहे. याठिकाणी हातळण्यात येणारे 'फायर अलार्म सिस्टम' आहे. 'फायर अलार्म पॅनेल' कुठेही लावण्यात आले नाही. या मजल्याचा आपत्कालीन पायऱ्यांशी कुठलाही संबंध नसल्याचेही उघडकीस आले. पथकाला या माळ्यावर 'होज रिल बॉक्स' आढळला. मात्र, त्याला पाइप जोडलेला नव्हता. तरीही प्रत्येक माळ्यावर पाण्याची सिस्टम लावण्यात आल्याने आग लागल्यास काही उपाययोजना करता येणे शक्य आहे. या तपासणीच्या दुसऱ्याच दिवशी प्रशासनाने प्रत्येक माळयावर १० आग प्रतिबंधक यंत्र लावले. स्मार्ट सिटीच्या सीईओचे कार्यालय असलेल्या पहिल्या माळ्यावरही 'होज रिल बॉक्स'ला कुठलीही जोडणी नाही. या संपूर्ण माळ्यावर तुषार फवारणीतून आगीवर पाण्याचा मारा करणारी यंत्रणाही लावण्यात आलेली नाही. मुख्यालयाच्या या इमारतीच्या उर्वरित पाच माळ्यावरील चित्रही काहीसे असेच आहे. या माळ्यांवरही धूम्रपान शोध यंत्र, होज रिल बॉक्सही कुठेही लावण्यात आलेले नाही. सातव्या माळ्यावर सीसीटीव्ही नियंत्रण कक्ष आहे. या माळ्यावरही आग प्रतिबंधक यंत्रणेत बऱ्याच त्रुट्या आढळल्या. या त्रुट्यांची यादी मिळाल्यावर तातडीने आवश्यक त्या यंत्रणा उभारणे व त्रुट्या सुधारण्याची कारवाई सुरू करण्यात आल्याची माहिती कार्यकारी अभियंता कार्यालयातून देण्यात आली.
या आहेत त्रुट्या
- तळमजल्यावर मेकॅनिकल व्हेंटीलेशन नाही.
- मॅन्युअली हाताळणाऱ्या इलेक्ट्रिक फायर अलार्म सिस्टमचा वापर.
- इमर्जन्सी पायऱ्यांवर कुठलाही पर्यायी मार्ग नाही.
- संपूर्ण इमारतीत पाण्याच्या फवाऱ्यांची व्यवस्था नाही.
- धूम्रपान शोध सिस्टमचा अभाव.
- पाण्याचा मारा करण्यासाठी उपयुक्त होज रिल बॉक्स नाही.
- आहे तिथे होज रिल वेज रायझर सिस्टमला जोडलेला नाही.