इमर्जन्सी वॉर्डातून प्लास्टिक सर्जन गायब

म. टा. प्रतिनिधी, नागपूरः शासकीय वैद्यकीय महाविद्यालय व रुग्णालयात कर्मचाऱ्यांचा बेताल कारभार नवा राहिलेला नाही. यात आता डॉक्टरांचीही भर पडली आहे. मेडिकलच्या शल्यक्रिया विभागाशी संलग्न आकस्मिक विभागातून (इमर्जन्सी) प्लास्टिक सर्जन कायम गैरहजर रहात असल्याने अपघातात जखमी झाल्याने गुंतागुंत निर्माण झालेल्या रुग्णांना ताटकळत रहावे लागत आहे. हा प्रकार वारंवार होत असल्याची तक्रार नातेवाइकांनी केली आहे.

पूर्वी विदर्भातील रुग्णांसाठी मेडिकल- मेयो एकमेव आशेचा किरण होते. मात्र, करोना दाखल झाल्यापासून आधीच रुग्ण हॉस्पिटलमध्ये पाय ठेवण्यास धजावत नाहीत. अशा वेळी अपघातात जखमी झाल्यानंतर दुसरा पर्याय नसल्याने मेडिकलच्या अस्थिरोग विभागात रुग्णसंख्या कायम आहे. मात्र येथे सध्या करोना बाधित रुग्णांसाठी सर्वाधिक असल्याने केवळ अत्यवस्थ रुग्णांना दाखल करून घेण्याचे प्रकार सुरू आहेत.

आता नागपूरसह विदर्भात करोनाचा प्रादुर्भाव कमी झाल्यावर येथेही रुग्णसंख्या कमी होऊ लागली आहे. मेडिकलमध्ये आता करोनाबाधितांच्या तुलनेत करोना नसलेले इतर आजाराचे रुग्ण वाढू लागले आहेत. निश्चितच त्यात अपघाताच्या रुग्णांचाही समावेश आहे. अपघातासह अन्य घटनांमध्ये जखमी झालेल्या रुग्णांना प्लास्टिक सर्जरी विभागातील डॉक्टरांचा सल्ला आवश्यक असतो. त्यामुळे हे तज्ज्ञ मेडिकलच्या आकस्मिक विभागात असायला हवे. परंतु हे डॉक्टर येथे नियुक्त केले जात नाही. त्यामुळे येथील मुख्य वैद्यकीय अधिकाऱ्यांना असे रुग्ण आल्यावर सूचना देऊन बोलवावे लागते.

परंतु एकाच वेळी अधिक रुग्ण आल्यास वा या डॉक्टरांना येथे रुग्णांना बघण्यासाठी यायला विलंब झाल्यास हे अत्यवस्थ रुग्ण येथे ताटकळत राहतात. त्यामुळे या प्रकाराने काही रुग्णांना करोना संक्रमणासह इतरही जोखीम संभावते. हा धोका टाळण्यासाठी येथे प्लास्टिक सर्जरी विभागाच्या डॉक्टरांची पूर्णवेळ नियुक्ती करण्याची मागणीही पुढे येत आहे. त्याबाबत लवकरच वैद्यकीय शिक्षणमंत्री अमित देशमुख यांना विदर्भ वैद्यकीय महाविद्यालय व आरोग्य सेवा कर्मचारी संघटनेकडून निवेदन दिले जाणार असल्याची माहिती संघटनेचे अध्यक्ष त्रिशरण सहारे यांनी दिली.