म.टा. प्रतिनिधी, नागपूर
पावसाळी अधिवेशनाला बुधवार पासून सुरुवात होत आहे. अधिवेशनादरम्यान २४ मोर्चे विधानभवनावर धडकणार आहे. बुधवारी खाकीच्या कवच्यात दोन मोर्चे धडक देतील. माओवाद्यांच्या धमकीनंतर मुख्यमंत्री देवेंद्र फडणवीस यांच्या सुरक्षेत वाढ करण्यात आली आहे. उपराजधानीत कोणतीही अनुचित घटना घडू नये, यासाठी कडेकोट पोलिस बंदोबस्त तैनात करण्यात आला आहे. माओवाद्यांच्या समर्थकांना ओळखणाऱ्या पोलिसांचे विशेष पथक तयार करण्यात आले आहे. हे पथक मोर्चे, उपोषण स्थळ, रामगिरी, विधानभवन परिसरात तैनात करण्यात येणार आहेत. ड्रोन व सीसीटीव्हीद्वारे प्रत्येक हालचाली टिपण्यात येणार आहे. संशयास्पद व्यक्तीला तात्काळ ताब्यात घेण्याचे आदेश देण्यात आले आहेत. नागपूर पोलिसांच्या मदतीला राज्य राखीव पोलिस दलाच्या सात तुकड्यांसह, सात पोलिस उपायुक्त, १५ सहायक पोलिस आयुक्त, ५० पोलिस निरीक्षक, सहा महिला पोलिस निरीक्षक, २०० सहायक पोलिस निरीक्षक व उपनिरीक्षक, १ हजार ७०० पोलिस कर्मचारी, २०० महिला पोलिसांसह अडीच हजार पोलिस सिव्हिल लाइन्स भागात तैनात करण्यात आले आहेत.