एटीएम लुटायला आले अन् आग लावून बसले; काही मिनिटांतच ठोकली धूम, नागपूरमधील घटना

म.टा. प्रतिनिधी, नागपूर : गॅस कटरने एटीएम कापण्याचा प्रयत्न करताना आग लागल्याने चोरटे पसार झाले. ही घटना जरीपटका पोलिस स्टेशन हद्दीतील जिंजर मॉल मार्गावरील कॅनरा बँकेच्या एटीएममध्ये घडली. या घटनेने पोलिसांमध्ये खळबळ उडाली आहे. पोलिसांनी चोरीचा गुन्हा दाखल करून चोरट्यांचा शोध सुरू केला आहे.

अशी आहे घटना

गुरुवारी पहाटे २ वाजताच्या सुमारास दोन चोरटे एमटीएममध्ये घुसले. एक बाहेर उभा होता. दोघांनी गॅस कटरने मशिन कापायला सुरुवात केली. अचानक आग लागली. एमटीएममध्ये धूर पसरला. घाबरून चोरट्यांनी गॅस कटर तेथेच सोडले अन् पोबारा केला. गुरुवारी सकाळी ही घटना उघडकीस आली. माहिती मिळताच साहाय्यक पोलिस आयुक्त संतोष खांडेकर, जरीपटका पोलिस स्टेशनचे वरिष्ठ पोलिस निरीक्षक संतोष बकाल यांच्यासह पोलिसांचा ताफा तेथे पोहोचला.

याप्रकरणी पोलिसांनी चोरीचा प्रयत्न केल्याचा गुन्हा दाखल केला. सीसीटीव्हीच्या आधारे पोलिस चोरट्यांचा शोध घेत आहेत.