म. टा. वृत्तसेवा, बेळगाव
कर्नाटक विधानसभा निवडणुकीचे वातावरण तापण्यास सुरुवात झाली असतानाच उत्तर विभागाचे आयजीपी आलोक कुमार यांना हिंडलगा कारागृहातील कैद्याने मोबाईलवर फोन करून आणि मेसेज पाठवून धमकी दिल्याने खळबळ उडाली आहे.
आलोक कुमार यांना २१ एप्रिल रोजी रात्री साडेनऊ वाजता फोन करून जीवे मारण्याची धमकी देण्यात आली होती. आलोक कुमार यांचे स्वीय सहाय्यक संजीव संगनवर यांनी याबाबत पोलिसांत तक्रार दिल्यानंतर पोलिसांनी तपास सुरू केला. तपासात हा फोन हिंडलगा कारागृहातून आल्याचे स्पष्ट झाले आहे. हिंडलगा कारागृहातील शहाजहान नावाच्या कैद्याने हा फोन केल्याचे उघड झाले असून, पोलिसांनी त्याच्याकडून मोबाइल आणि सीमकार्ड ताब्यात घेतले आहे. शहाजहान हा मूळचा केरळचा असून, मंगलोर येथील हत्या प्रकरणातील आरोपी आहे.
'सलाम वालेकुम, नमस्ते. या वर्षी मी कोण आहे, हे मी तुम्हाला दाखवतो. मी एम. एस. अलिखान नक्षलवादी असून, आरडीएक्स, एके ५६ ,नायट्रोजन आणि ग्रेनेड एक्स्पर्ट आहे,' अशी धमकी शहाजहानने फोनवरून दिली होती. आलोक कुमार हे कडक शिस्तीचे आणि कर्तव्यदक्ष अधिकारी म्हणून ओळखले जातात. गुन्हेगारांचे कर्दनकाळ अशी त्यांची ओळख आहे. त्यांनी पदभार स्वीकारल्यानंतर आपल्या उत्तर विभागातील गुन्हेगारांची परेड घेऊन त्यांना सज्जड दम भरला आहे. गुन्हेगारी कारवाया कराल, तर तुमची गय केली जाणार नाही, असा इशारा गुन्हेगारांना दिला आहे. त्यामुळेच त्यांना अशा प्रकारची धमकी आल्याचे बोलले जात आहे.