विदर्भात तीन नवे पासपोर्ट केंद्र

नागपूर : विदर्भातील नागरिकांना पासपोर्ट काढणे अधिक सुलभ व्हावे म्हणून तीन नवीन पासपोर्ट सेवा केंद्र सुरू करण्यात आले आहेत. परराष्ट्र मंत्रालयाच्या वेबसाइटवर ही माहिती जाहीर करण्यात आली आहे. महाराष्ट्रात एकूण पाच केंद्र सुरू करण्यात आले आहेत. त्यापैकी तीन विदर्भातील आहेत. अकोला, अमरावती, चंद्रपूर येथे ही सेवा आता मिळणार आहे. विदर्भातील काही लोकप्रतिनिधींनी यासाठी पाठपुरावा केला होता. वाढती मागणी लक्षात घेता परराष्ट्र व्यवहार मंत्री सुषमा स्वराज यांनी नवीन सेवाकेंद्र सुरू करण्यास मान्यता प्रदान केली. आतापर्यंत विदर्भातील नागरिकांना नागपूर, मुंबई, पुणे येथे जाऊन पासपोर्ट काढावे लागत होते. ही प्रक्रिया करताना त्यांना अनेक अडचणींचा सामना करावा लागत होता. त्यामुळे या शहरांमध्येच सेवाकेंद्र सुरू व्हावे अशी मागणी होती.