- माहुली जहाँगीर नजीकची घटना; मृतक वरूड येथील रहिवासी
म.टा. वृत्तसेवा, अमरावती
ट्रॅक्टर व कारच्या भीषण अपघातात एकाच कुटुंबातील तिघे ठार झाल्याची घटना शनिवारी दुपारी माहुली जहाँगीर नजीक घडली. तिघेही मृतक वरूड येथील रहिवासी आहेत. घटनेनंतर वरूडमध्ये शोककळा पसरली. सोमेश प्रभाकर काळबेंडे (वय २६), प्रभाकर रामचंद्र काळबेंडे (वय ६५) व राजमती प्रभाकर काळबेंडे (वय ६२) अशी मृतकाची नावे आहेत. अपघातामध्ये प्रभाकर काळबोंडे यांचा नातू वरद सुरेंद्र दोंदळकर (वय १०) गंभीर जखमी झाला असून त्याच्यावर रूग्णालयात उपचार सुरू आहेत.
सोमेश काळबेंडे हा शनिवारी वडील प्रभाकर यांना अमरावती येथे दवाखान्यात आणण्यासाठी वरूड येथून सकाळी अकरा वाजता एमएच. २७/बी. झेड.०७०६ क्रमांकाच्या कारने निघाला होता. अमरावतीकडे येत असताना दुपारी एक वाजताचे सुमारास माहुली जहाँगीर पुढे असलेल्या एका पुलावरून कार जात असताना रस्त्याच्या कडेला उभ्या असलेल्या ट्रॅक्टरवर आदळली. यात कारच्या दर्शनी भागाचा पूर्णत: चेंदामेंदा झाला. हा अपघात एवढा भीषण होता की, अपघातामध्ये प्रभाकर काळबेंडे, राजमती काळबेंडे व सोमेश काळबेंडे जागीच ठार झाले. तर दहा वर्षीय वरद दोंदळकर हा गंभीर जखमी झाला. अपघात घडताच या मार्गावरून जाणारे नागरिकांनी घटनास्थळी धाव घेतला. माहुली जहाँगीर पोलिसांना घटनेची माहिती मिळताच पोलिस घटनास्थळी दाखल झाले. गंभीर जखमी झालेल्या वरदला तत्काळ जिल्हा सामान्य रूग्णालयात हलविण्यात आले. वरद याची प्रकृती गंभीर असल्याने त्यास खाजगी रूग्णालयात हलविण्यात आले. घटनेची माहिती मिळताच वरूड येथील काळबेंडे यांचे नातेवाईक व नागरिक अमरावतीला पोहोचले. मृतक प्रभाकर काळबेंडे व त्यांच्या पत्नी राजमती सेवानिवृत्त शिक्षक होते. मुलगा सोमेश हा कृषी संबंधित व्यवसाय करीत होता. याप्रकरणी पोलिसांनी ट्रॅक्टर चालकावर गुन्हा दाखल केला आहे.
----------------------------------