साईबाबा प्रकरण: आज माओवाद्यांचा भारत बंद;

म. टा. वृत्तसेवा, गडचिरोली

प्रा. जी. एन. साईबाबासह इतर पाच जणांना शिक्षा सुनावल्याचा निषेध म्हणून माओवाद्यांनी आज, बुधवारी भारत बंदचे आवाहन केले आहे. माओवाद्यांच्या या बंदविरोधात गडचिरोलीसह संपूर्ण दंडकारण्यात अतिसतर्कतेचा इशारा देण्यात आला आहे.

बस्तर, ओडिशा, तेलंगणसह गडचिरोलीच्या दुर्गम तालुक्यात या शिक्षेविरोधात माओवाद्यांनी पत्रके टाकून कापडी बॅनरही लावले. त्यात स्पष्टपणे प्रा. साईबाबा, हेम मिश्रा आणि प्रशांत राहीच्या अटकेला विरोध दर्शविला आहे. या पत्रकांमध्ये दंडकारण्यात पोलिस आणि सुरक्षा यंत्रणांकडून मानवाधिकार कार्यकर्त्यांना त्रास दिला जात असल्याचा आरोपही केला आहे. माओवाद्यांनी साईबाबासंदर्भात घेतलेल्या भूमिकेवर पोलिसांनी टीका केली आहे. आतापर्यंत माओवाद्यांशी आपला संबंध नसल्याचे साईबाबांनी म्हटले होते. आता या अटक आणि शिक्षेचा विरोध करून माओवादी भारत बंदचे आवाहन केल्याने प्रा. साईबाबांचा किती घनिष्ट संबंध आहे, हे स्पष्ट होत असल्याचेही पोलिसांनी म्हटले आहे.

दरम्यान, या बंददरम्यान कुठलीही अनुचित प्रकार घडू नये म्हणून गडचिरोली पोलिसांनी चोख व्यवस्था उभारली आहे आहे. दुर्गम भागातील पोलिस ठाण्यांच्या सुरक्षेत वाढ करण्यात आली आहे. अतिसंवेदनशील भागात माओवादविरोधी अभियान तीव्र करून दंडकारण्यात येणाऱ्या चारही राज्यातील सुरक्षा दलांसह गुप्तचर यंत्रणाही परिस्थितीवर नजर ठेवून असल्याची माहिती पोलिस अधीक्षक अभिनव देशमुख यांनी दिली आहे.