म.टा. विशेष प्रतिनिधी, नागपूर
'मेरी शक्ती-मेरा संविधान' अशी घोषणा करत काँग्रेस नेत्यांद्वारे प्रणित बहुजन विचार मंचने 'संविधान जागर'चा घोष केला आहे. आज, रविवारी दुपारी ३ वाजता मानकापूर स्टेडियमवर सभा होईल. मोदी सरकारवर शरसंधान करणारे अभिनेते प्रकाश राज आणि जेएनयूचे विद्यार्थी नेते व एआयएसएफचे उपाध्यक्ष कन्हैयाकुमार सभेचे आकर्षण मुख्य आकर्षण राहणार आहेत.
भारिप-बहूजन महासंघाचे नेते प्रकाश आंबेडकर यांच्या वंचित बहुजन आघाडीच्या सभेपाठोपाठ संविधान दिवस साजरा करण्यात आल्यानंतर बहुजन विचार मंचने संविधान जागर सभा आयोजित केली आहे. बहुजनांच्या हितासाठी राज्यघटनेची शक्ती सर्वसामान्यांपर्यंत पोहोचवण्याच्या उद्देशाने हा जागर असल्याचा दावा मंचच्या नेत्यांनी केला आहे. ज्येष्ठ साहित्यिक डॉ. यशवंत मनोहर, काँग्रेसच्या अनुसूचित जाती सेलचे राष्ट्रीय अध्यक्ष नितीन राऊत, राष्ट्रवादीच्या खासदार सुप्रिया सुळे, अल्पसंख्याक सेलचे नदिम जावेद प्रमुख पाहुणे म्हणून उपस्थित राहतील.
बहुजन विचार मंचने गेल्या काही महिन्यांपासून विविध घटकांना एकत्र करण्याचे प्रयत्न सुरू केले. या अंतर्गत आजी-माजी खासदार मधुकर कुकडे व नाना पटोले यांचा सत्कार करून विविध नेत्यांना एका व्यासपीठावर आणले. शहर काँग्रेसचे प्रमुख पदाधिकारी वगळता अन्य नेते आवर्जुन उपस्थित होते, हे विशेष. आता संविधान जागरसाठी विविध नेते व त्यांचे समर्थक सक्रिय झाले.
मंचच्या बॅनरखाली होणाऱ्या या कार्यक्रमासाठी काँग्रेसचे आजी-माजी नगरसेवक, शहर व राज्यातील पदाधिकाऱ्यांचा समावेश असलेली जम्बो संयोजन समिती स्थापन करण्यात आली आहे. या माध्यमातून होणाऱ्या शक्तिप्रदर्शनात काँग्रेसच्या अनुसूचित जाती मोर्चाचे राष्ट्रीय अध्यक्ष नितीन राऊत, पक्षातून निलंबित केलेले माजी मंत्री सतीश चतुर्वेदी, माजी आमदार अशोक धवड, महापालिकेतील विरोधी पक्षनेते तानाजी वनवे यांच्यासह त्यांचे समर्थक कामाला लागले. ठिकठिकाणी बैठका घेतल्या. मात्र, यापासून शहर अध्यक्ष विकास ठाकरे व माजी केंद्रीय मंत्री विलास मुत्तेमवार गटाला दूर ठेवले. त्यांचे समर्थक पदाधिकारी वा नेत्यांचा संयोजन समितीत समावेश नाही.