नियोजित एफडीए भवनाचे उद्या मुख्यमंत्र्यांच्या भूमीपूजन

म.टा. प्रतिनिधी, नागपूर

अन्न व औषधांचे नमुने तपासण्यासाठी स्वतंत्र प्रयोगशाळेच्या व्यवस्थेसह प्रशासकीय कामकाजासाठी उभारल्या जाणाऱ्या नियोजित सुसज्ज इमारतीचे रविवार,२९ जुलै रोजी मुख्यमंत्री देवेंद्र फडणवीस यांच्या हस्ते भूमीपूजन होणार आहे. अध्यक्षस्थानी केंद्रीय रस्ते वाहतूक आणि महामार्ग मंत्री नितीन गडकरी राहतील. सिव्हिल लाइन्स परिसरातील वेस्ट हायकोर्ट रोडवर हा कार्यक्रम होईल.

कार्यक्रमास अर्थ व नियोजन मंत्री सुधीर मुनगंटीवार, अन्न व नागरी पुरवठा व अन्न व औषध प्रशासन मंत्री गिरीश बापट, पालकमंत्री चंद्रशेखर बावनकुळे, सामान्य प्रशासन विभागाचे राज्य मंत्री मदन येरावार महापौर नंदा जिचकार, वैद्यकीय शिक्षण व औषधी विभागाचे सचिव संजय देशमुख, अन्न व औषध प्रशासन विभागाचे आयुक्त डॉ. पल्लवी दराडे आदी प्रमुख पाहुणे म्हणून उपस्थित राहणार आहेत. वेस्ट हायकोर्ट रोडवरील नागपूर मेट्रो कार्यालयासमोर अन्न व औषध प्रशासन प्रयोगशाळा तसेच अन्न व औषध प्रशासन कार्यालयाचे प्रशासकीय इमारत उभी राहणार असून ही इमारत सुमारे दीड हजार चौरस मीटर परिसरात बांधण्यात येणार आहे. या इमारतीसाठी जिल्हाधिकारी अश्विन मुदगल यांनी जमीन उपलब्ध करुन दिली आहे. यावेळी खासदार विकास महात्मे, कृपाल तुमाने, अन्न व औषध प्रशासनाचे सहआयुक्त डॉ. राकेश तिरपुडे व नागपूर विभागाचे सहआयुक्त प्र. ना. शेंडे उपस्थित राहतील.