धापेवाडा येथील आषाढी उत्सव रद्द

नागपूर : संपूर्ण विदर्भात श्रद्धास्थान असलेल्या धापेवाडा येथील आषाढी महोत्सव यावर्षी रद्द करण्यात आला आहे. करोना प्रतिबंधात्मक उपाययोजनेंतर्गत प्रशासनाने हा निर्णय घेतला असून नागरिकांनी सहकार्य करावे, असे आवाहन करण्यात आले. अतिरिक्त जिल्हा दंडाधिकारी अविनाश काकडे यांनी या संदर्भातील निर्देश जारी केले.

गेल्या २८० वर्षांपासून अखंडितपणे श्री क्षेत्र धापेवाडा येथे मंदिराच्या परंपरेनुसार आषाढीनिमित्त परीपाठाचे कार्यक्रम होत असतात. यासाठी या मंदिराचे अध्यक्ष रुद्रप्रतापसिंह पवार यांनी यावर्षी परवानगी मागितली होती. मात्र, करोना प्रादुर्भावाची संभाव्य तिसरी लाट लक्षात घेता राज्य शासनाने कडक निर्बंध लावले आहेत. सध्या नागपूर जिल्ह्यात स्तर-३चे निर्बंध लागू असल्याने परिपाठ कार्यक्रमास परवानगी देता येणार नाही. तसेच यासारख्या इतर धार्मिक कार्यक्रमांना देखील परवानगी देता येणार नसल्याचे प्रशासनाकडून स्पष्ट करण्यात आले.

साध्या पद्धतीने साजरी करा बकरी ईद

२१ जुलै रोजी बकरी ईद हा मुस्लिम बांधवांचा सण येत आहे. तथापि, यावर्षी करोना प्रतिबंधात्मक उपाय योजना राज्यात लागू आहे. त्यामुळे कोणत्याही परिस्थितीत या आदेशाचे उल्लंघन होणार नाही, याची काळजी सर्वांनी घेण्याचे आवाहन जिल्हा प्रशासनाने केले आहे. यावर्षीची बकरी ईद अगदी साधेपणाने साजरी करावी. तसेच शासनाने निर्गमित केलेल्या मार्गदर्शक सूचनांचे काटेकोरपणे पालन करावे, असे आवाहन जिल्हा प्रशासनाने केले आहे.