नागपूर : चित्रपट निर्मात्याच्या मुलाचा ८२ हजार रुपये किमतीचा आयफोन, अन्य एक महागडा फोन, ५ हजार रुपये रोख व महत्त्वाची कागदपत्रे असा एकूण १ लाखाचा मुद्देमाल चोरट्याने लंपास केला. ही घटना मुंबई-नागपूर दुरंतो एक्स्प्रेसमध्ये शुक्रवारी मध्यरात्रीनंतर उघडकीस आली. अभिषेक इंगळे (२४, रा. गणेश मंदिरजवळ, बडकस चौक) असे प्रवाशाचे नाव आहे. त्याचे शिक्षण सुरू असून तो स्वत:चे कामही करतो. त्याचे वडील लहानू इंगळे हे प्रसिद्ध वाजंत्री पथकाचे संचालक असून चित्रपटनिर्मितीच्या क्षेत्रातही त्यांनी आपले पाय रोवले आहेत. अभिषेक शुक्रवारी रात्री मुंबईहून नागपूरकडे येणाऱ्या दुरंतोने निघाला. एस-५ क्रमांकाच्या डब्यातून त्यांचा प्रवास सुरू होता. रात्री त्याने आपल्याकडील महत्त्वाचे सामान सोबत असलेल्या महिलेच्या पर्समध्ये ठेवून दिले. रात्रीची वेळ असल्याने सर्वच प्रवासी झोपेत होते. ही संधी साधून चोरट्याने पर्स लांबवली. भुसावळ स्टेशन येण्यापूर्वीच झोप उघडली असता अभिषेकला पर्स दिसली नाही. रात्री सर्वत्र शोध घेऊही पत्ता लागला नाही. शिवाय, त्यातील मोबाइलवर संपर्कही होत नव्हता. यावरून पर्स चोरीला गेल्याचे स्पष्ट झाले. नागपूर रेल्वेस्थानकावर शनिवारी सकाळी गाडी थांबताच अभिषेकने लोहमार्ग ठाणे गाठून तक्रार दिली. पोलिसांनी गुन्हा दाखल केला आहे.
दुरंतो एक्स्प्रेसमध्ये प्रवाशाला फटका
चित्रपट निर्मात्याच्या मुलाचा ८२ हजार रुपये किमतीचा आयफोन, अन्य एक महागडा फोन, ५ हजार रुपये रोख व महत्त्वाची कागदपत्रे असा एकूण १ लाखाचा मुद्देमाल ...
महाराष्ट्र टाइम्स.कॉम 18 Nov 2019, 4:00 am