वणीत अधिकाऱ्यांच्या टेबलवर फेकली तूर

म. टा. वृत्तसेवा, यवतमाळ
शेतकऱ्यांच्या तूर खरेदीबाबत सरकार उदासीन धोरण राबवित असल्याने शेतकरी चिंतातूर झाला आहे. याबाबत बुधवारी वणीच्या छत्रपती शिवाजी महाराज चौकातून विविध संघटनांच्या पदाधिकारी व कार्यकर्त्यांनी एकत्रित येऊन उपविभागीय अधिकाऱ्यांच्या कार्यालयापर्यंत तूर फेकत सरकारच्या तूर खरेदी धोरणाचा निषेध नोंदविण्यात आला. निवेदन देत मागण्यांकडे लक्ष वेधले.
हमी भावाने नाफेडमार्फत तूर खरेदी होत असतानाच अचानक शनिवारपासून तूर खरेदी बंद करण्यात आली. ही संधी साधत व्यापाऱ्यांनी तुरीचे भाव पाडले. आजही शेतकऱ्यांच्या घरात हजारो क्विंटल तूर आहे. १६०० रुपये प्रती क्विंटलने भाव कोसळले. त्यामुळे संतप्त शेतकरी बुधवारी दुपारी १ वाजता शिवाजी चौकात श्री गुरुदेव सेना, संभाजी ब्रिगेड, शेतकरी संघटना व विदर्भ राज्य आंदोलन समितीचे पदाधिकारी व कार्यकर्ते एकत्रित आले. त्यांनी सरकारविरोधी घोषणाबाजी केली. शेतकरीविरोधी धोरणांचा जाहीर निषेध केला. तूर भररस्त्यावर फेकत उपविभागीय अधिकाऱ्यांचे कार्यालय गाठले. कार्यालयाच्या बाहेर व टेबलवर तुरीचा सडा पडला होता.