अमरावतीत पोलिस कर्मचाऱ्यास बेदम मारहाण

म. टा. प्रतिनिधी, अमरावती

‘लिव्ह इन रिलेशनशीप’मध्ये राहणाऱ्यांनी मित्राच्या सहाय्याने एका पोलिस कर्मचाऱ्यास बेदम मारहाण केली. वडाळी परिसरातील साईविला अपार्टमेंटमध्ये रविवारी रात्री ही घटना घडली.

पोलिसांनी मारहाण करणाऱ्या अविवाहित जोडप्यासह त्यांच्या मित्रांविरुद्ध गुन्हा दाखल करून अटक केली आहे. सचिन चेतराम मोहोकार (३३) असे जखमी पोलिस कर्मचाऱ्याचे नाव आहे. सचिन मोहोकार ग्रामीण पोलिस दलात कार्यरत आहेत. तर त्यांच्या पत्नी उपनिरीक्षक आहेत. मोहोकार राहत असलेल्या अपार्टमेंटमध्ये भावेश महेश वंजारी (२०) हा युवक त्याच्या अल्पवयीन मैत्रीणीसह गेल्या अनेक महिन्यांपासून राहत आहेत. मोहोकार रविवारी रात्री नऊ वाजताच्या सुमारास त्यांच्या उपनिरीक्षक पत्नीसह घरी परतले. तेव्हा भावेश युवतीसह पार्किंगच्या ठिकाणी उभा होता. मोहोकार यांनी त्यास हटकले. यावरून दोघांमध्ये वाद झाला. भावेशने त्याच्या मित्रांना बोलावून मोहोकार यांना बेदम मारहाण केली. सचिन यांच्या उपनिरीक्षक पत्नीने पतीला वाचविण्याचा प्रयत्न केला. घटनेची माहिती फ्रेजरपुरा पोलिसांना देण्यात आली. पोलिसांनी तातडीने घटनास्थळ गाठून भावेश, त्याची प्रेयसी व मित्रांना ताब्यात घेतले.