मुंबई दंगलीमध्ये अडकलेल्या लोकांना का वाचवले नाही ?

उस्मानाबाद : अयोध्या प्रकरणानंतर मुंबईत दंगल पेटली. राधाबाई चाळ पेटवून दिली गेली. त्यावेळी सत्तेत तुमचे सरकार होते. तुम्ही लोकांना का वाचवले नाही ? तुम्ही तुमच्या पापाची फळे भोगत आहात, अशा शब्दांत शिवसेना पक्षप्रमुख उद्धव ठाकरे यांनी राष्ट्रवादी काँग्रेसचे अध्यक्ष शरद पवार यांच्यावर टीकास्त्र सोडले.

उस्मानाबाद-कळंब विधानसभा मतदारसंघाचे महायुतीचे उमेदवार कैलास पाटील यांच्या प्रचारार्थ ठाकरे यांची सोमवारी उस्मानाबादेत जिल्हा परिषद कन्या शाळेच्या प्रांगणावर सभा झाली. ठाकरेंनी आपल्या भाषणात पवारांना टार्गेट केले. पहिल्यावेळी दंगल झाली तेव्हा सुधाकरराव नाईक आणि दुसऱ्यांदा शरद पवार मुख्यमंत्री होते. निष्पाप लोकांना मारले जात असताना तुम्ही गप्प कसे बसलात? १० वर्षांनंतर तुम्हाला शिवसेनाप्रमुखांचा गुन्हा आठवला. गुन्हा होता हिंदूंना वाचवल्याचा. शिवसेनाप्रमुखांनी त्यांना वाचवले हे मी अभिमानाने सांगतो. तेव्हा तुम्ही सरकारमध्ये होता मग दंगेखोरांना गोळ्या का घातल्या नाहीत ? तुम्ही तुमच्या पापाची कर्म भोगत आहात, असे ठाकरे यांनी स्पष्ट केले.

'माझ्या मनात पाप नाही. ही निवडणूक जिंकायचीच आहे. शिवसेनेला सत्ता पाहिजे. सेनेने सामान्य कुटुंबातील उमेदवार दिलेले आहेत, त्यांना निवडून द्या. सभागृहात बसून ते शेतकऱ्यांचे प्रश्न सोडवतील. आमच्या वचननाम्यावर शरद पवार टीका करतात. पण, त्यांना मला इशारा द्यायचा आहे, की आम्ही गरीबांसाठी १० रुपयांत थाळी देणार आहोत, त्या अन्नात खड्यासारखे येऊ नका,' असे ठाकरे यांनी नमूद केले. यावेळी उमेदवार कैलास पाटील, खासदार ओम राजेनिंबाळकर, नगराध्यक्ष मकरंद राजेनिंबाळकर आदी उपस्थित होते. उस्मानाबादमधील सभेनंतर ठाकरे यांची परंड्यात डॉ. तानाजी सावंत यांच्या प्रचारार्थ सभा झाली.