उद्धव ठाकरे-सरसंघचालकांची नोटाबंदीवर तासभर चर्चा

मटा ऑनलाइन वृत्त । नागपूर

शिवसेना पक्षप्रमुख उद्धव ठाकरे यांनी आज राष्ट्रीय स्वंयसेवक संघाचे प्रमुख मोहन भागवत यांची भेट घेतली. तब्बल तासभर चाललेल्या या बैठकीत नोटाबंदीसह आणखी काही महत्वाच्या राजकीय विषयांवर चर्चा झाली. स्वत: उद्धव ठाकरे यांनी ही माहिती दिली. परंतू इतर राजकीय विषयावर झालेल्या चर्चेची माहिती देणे त्यांनी टाळले.

केंद्रीय परिवहन मंत्री नितीन गडकरी यांच्या कन्येचा विवाह असल्याने या विवाह सोहळ्याला उपस्थित राहण्यासाठी उद्धव ठाकरे आज नागपुरात आले होते. विवाह सोहळ्यापुर्वी त्यांनी रेशीमबागेतील संघाच्या मुख्यालयात जाऊन सरसंघचालक मोहन भागवत यांची भेट घेतली. यावेळी आदित्य ठाकरे हे सुद्धा उपस्थित होते. सर्वसामान्यांना नोटाबंदीचा त्रास होत आहे. त्याबाबत शिवसेनेने घेतलेल्या भुमिकेवर या बैठकीत चर्चा करण्यात आली. त्याशिवाय आणखी काही राजकीय विषयांवर चर्चा झाल्याचे उद्धव ठाकरे यांनी सांगितले. ठाकरे आणि भागवत यांची चर्चा सुरु असतानाच केंद्रीय गृहमंत्री राजनाथ सिंह हे सुद्धा यावेळी तिथे पोहचले.