आजपासून मनपातर्फे व्यवस्था
म. टा. विशेष प्रतिनिधी, नागपूर
लॉकडाऊनदरम्यान कुणीही व्यक्ती घराबाहेर पडू नये, यासाठी मनपा प्रशासन विविध प्रयत्न करीत आहे. काही औषधी दुकाने २४ तास सुरू ठेवण्याचा आणि शहरातील ४५ दुकानांतून घरपोच किराण्याची व्यवस्था केल्यानंतर आता भाज्या आणि दुग्धजन्य पदार्थ घरपोच मिळण्याचीही व्यवस्था करण्यात आली आहे. मनपा आयुक्त तुकाराम मुंढे यांच्या प्रयत्नातून आणि पुढाकारातून ही व्यवस्था करण्यात आली आहे.
शहरालगतच्या गावातील शेतकऱ्यांशी कृषी विभागाच्या माध्यमातून संपर्क साधण्यात आला आहे. त्यांना फोन केल्यास त्यांच्या माध्यमातून भाजीपाला घरपोच उपलब्ध होणार आहे. याचप्रकारे दूधविक्रेते आणि दुग्धजन्य पदार्थांच्या विक्रेत्यांशीही चर्चा करून हे पदार्थही घरपोच मिळतील, अशी व्यवस्था करण्यात आली आहे. भाजीपाला, दूध आणि दुग्धजन्य पदार्थांसाठी सुमारे १४० विक्रेत्यांची यादी मोबाइल क्रमांकासह प्राप्त झाली असून, ती मनपाच्या अधिकृत वेबसाइट आणि फेसबुक पेजवर उपलब्ध आहे. या यादीमधील मोबाइल क्रमांकावर फोन करून नागरिकांना आता भाजीपाला, दुग्धजन्य पदार्थ घरीच मागविता येतील. कृषी विभागाच्या सहकार्यानेसुद्धा नागपूरच्या विविध भागांत शेतकरी भाजीपाला उपलब्ध करणार आहेत. त्यांचीदेखील यादी प्रसिद्ध करण्यात आली आहे.
बाहेर पडू नकाच...
शहरातील रामदासपेठ, रविनगर, लकडगंज, मेडिकल चौक अशा मुख्य परिसरातील दुग्धजन्य पदार्थ विक्रेत्यांचा घरपोच सेवा देणाऱ्यांमध्ये समावेश आहे. १५ एप्रिलपर्यंत अनावश्यक कामासाठी मुळीच बाहेर पडू नये. करोनापासून बचावासाठी ही सोय आहे. त्यामुळे या सेवेचा लाभ नागरिकांनी घ्यावा, असे आवाहन मनपा आयुक्तांनी केले आहे.