अ‍ॅपशहर

विदर्भात संतापाची ‘गारपीट’

गेल्या तीन दिवसांपासून विदर्भात होत असलेल्या गारपिटीमुळे हातचे पीक गेल्याने शेतकरी हवालदिल झाले आहेत. कर्जबाजारीपणामुळे आधीच मेटाकुटीस आलेल्या शेतकरी या नुकसानामुळे संतप्त झाला आहे...

Maharashtra Times 14 Feb 2018, 5:21 am
गारपीटग्रस्त शेतकरी रस्त्यावर; टायर जाळून शासनाचा निषेध
महाराष्ट्र टाइम्स.कॉम hailstorm


टीम मटा

गेल्या तीन दिवसांपासून विदर्भात होत असलेल्या गारपिटीमुळे हातचे पीक गेल्याने शेतकरी हवालदिल झाले आहेत. कर्जबाजारीपणामुळे आधीच मेटाकुटीस आलेल्या शेतकरी या नुकसानामुळे संतप्त झाला आहे. झालेल्या नुकसानाचे तातडीने सर्व्हेक्षण करून मदत द्यावी, अशी मागणी करीत विदर्भातील नागपूर जिल्ह्यासह वर्धा आणी अन्य जिल्ह्यांतील शेतकऱ्यांनी मंगळवारी रस्त्यावर उतरून आंदोलन केले. रस्त्यावर टायर जाळून शासनाच्या धोरणाचा निषेध केला. पावसामुळे गहू पीक कोलमडून पडला असून हरभऱ्याच्या गाठी फुटू लागल्या आहेत, तर संत्रापिकाचे मोठे नुकसान झाले आहे.

वर्ध्यात तब्बल साडेतीन तास रास्तारोको

वर्धा : जिल्ह्यात गेल्या दोन दिवसांत वादळीवाऱ्यासह झालेल्या गारपिटीमुळे चार महिन्यांपासून जीवापाड जोपासलेल्या रब्बी पिकाचे अतोनात नुकसान झाले आहे. यामुळे जिल्ह्यातील शेतकरी संतप्त झाले असून 'झालेल्या नुकसानाचे महिन्याभरात सर्वेक्षण करून मदत द्या' अशी मागणी करीत कारंजा तालुक्यातील शेतकऱ्यांनी मंगळवारी रस्त्यावर उतरत चक्का जाम आंदोलन केले. नागपूर-अमरावती महामार्गावरील हेटीकुंडी फाट्यानजीक सकाळी ९ वाजतापासून तब्बल साडेतीन तास चक्का जाम आंदोलन करण्यात आले. यावेळी महामार्गावर संत्रा फेकून शेतकऱ्यांन संताप व्यक्त केला. शेतकऱ्यांनी रस्ता रोखून धरल्याने काही काळ तणावाचे वातावरण निर्माण झाले होते. आंदोलनामुळे दुतर्फा वाहनांची महामार्गावर रांग लागली होती.

कारंजा तालुक्याला गारपिटीने चांगलेच झोडपले आहे. कारंजा(घाडगे)तालुक्यात गारपीट झाल्याने शेतकऱ्यांचे मोठ्याप्रमाणात नुकसान झाले. शासनाचा कोणताही प्रतिनिधी मोक्कापाहणी करण्याकरिता गेले नाहीत. त्याविरोधात शेतकऱ्यांनी हेटीकुंडी वर्धा रोड व राष्ट्रीय महामार्ग क्रमांक-६वर आंदोलन करीत वाहतूक रोखून धरली. नुकसानग्रस्त शेतकऱ्यांना त्वरित सर्वेक्षण करून नुकसानभरपाई देण्यात यावी, अशी मागणी यावेळी केली. खासदार आनंदराव अडसुड तसेच आमदार काळे यांनी मध्यस्ती केल्यानंतर आंदोलन मागे घेण्यात आले. एक महिन्यात शेतकऱ्यांना गारपिटीचा मोबदला द्या, अशीही मागणीही यावेळी करण्यात आली. मागणी पूर्ण न झाल्यास पुन्हा रस्त्यावर ऊतरण्याचा इशाराही आंदोलक शेतकऱ्यांनी दिला.

वीज पडून गाय, बैलाचा मृत्यू

समुद्रपूर तालुक्यातील पारोधी येथे सोमवारी सायंकाळच्या सुमारास वीज पडून बालाजी उंभाटे यांच्या शेतातील गाय व बैलाचा मृत्यू झाला. यात उंभाटे यांचे अंदाजे दीड लाख रुपयांचे नुकसान झाले. तसेच पावसामुळे गहू पीक कोलमडले असून हरभऱ्याच्या गाठी फुटू लागल्याने नुकसान होत आहे. मागील दोन ते तीन दिवसांपासून असलेल्या आभाळामुळे हरभऱ्यावर घाटेअळीचा जोर दिसू लागला आहे. पारोधी, राळेगाव, वायगाव, मुरादपूर, बोडखा, खैरगाव, सावरखेडा, तास, परडा, शेडगाव, मांडगाव इत्यादी गावात शेतकऱ्यांचे मोठे नुकसान झाले आहे.

विरुळनजीक चक्काजाम

आर्वी तालुक्यातील विरळनजीकच्या वाई व पिपलधारी येथे गारपिटीमुळे मोठ्या प्रमाणात नुकसान झाले आहे. घराचे छप्पर उडाले, तर काही ठिकाणी घराच्या भिंतीही कोसळल्या. शेतकऱ्यांची पिके उद्ध्वस्त झाली. गारपिटीमुळे मोठ्या प्रमाणात गावात नासधूस झाल्याने विरळजवळील वाई फाट्यावर शेतकऱ्यांनी चक्का जाम आंदोलन करीत तातडीने मदत द्यावी, अशी मागणी आंदोलक शेतकऱ्यांनी केली.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज