विदर्भाला मान्सूनची आस

महावितरणचा हलगर्जीपणा; शेतकऱ्याचा मृत्यू

बुलडाणा : पेरणी करीत असताना शेतातून जाणाऱ्या विजेच्या तारांचा स्पर्श होऊन युवा शेतकऱ्याचा मृत्यू झाल्याची घटना रविवारी लोणार तालुक्यातील शारा शेतशिवारात घडली. ज्ञानेश्वर उद्धव लहाने (२५), असे त्यांचे नाव आहे. शेतातून खाली आलेल्या विद्युत तारा व्यवस्थित करण्यासंदर्भात शेतकऱ्याने वारंवार निवेदन दिले होते. मात्र अधिकाऱ्यांनी टाळाटाळ केल्याने ज्ञानेश्वर यांचा मृत्यू झाल्याचा आरोप गावकऱ्यांनी केला आहे. यापूर्वी तांबोळा येथील एका शेतकऱ्याच्या जनावरांचा डीपीच्या धक्क्याने मृत्यू झाला होता.

२६७ गावांना पूरधोका

म. टा. वृत्तसेवा, बुलडाणा

मान्सूनपूर्व पाऊस दमदार झाल्यानंतर आता मान्सूनची प्रतीक्षा आहे. मात्र यंदाच्या पावसात सुमारे २६७ गावे पुरात अडकण्याचा धोका वर्तविण्यात आला आहे. यातील सुमारे २० गावे पूरदृष्ट्या अतिसंवेदनशील आहेत.

७१२ मिमी वार्षिक सरासरी पर्जन्यमान असलेल्या जिल्ह्यात पैनगंगा, खडकपूर्णा, पूर्णा, नळगंगा, विश्वगंगा, ज्ञानगंगा, मस, मन, तोरणा, वान, बोर्डी, व्याघ्रा आदी प्रमुख नद्या आहेत. यातच १३ तालुके, ९६६१ चौरस किलोमीटर भौगोलिक क्षेत्र अन् २५ लाखावर लोकसंख्या आहे. जिल्ह्यातील ८६ गावे अतिप्रवण क्षेत्रात मोडत असून पाच तालुक्यांमध्ये २० गावे पूरदृष्टीने अतिसंवेदनशील आहेत. यामध्ये बेलाड, खरकुंडी, येरळी, परसोडा, उमरखेड, इसरखेड, हिंगणाभोटा, तरोडी, रोटी, दादगाव, इसापूर (नांदुरा), गोळेगाव खुर्द (शेगाव), म्हैसवाडी, काळेगाव, हरसोडा (मलकापूर), उत्रादा, पेठ, सवणा (चिखली), सावरगाव तेली, किनगाव जट्ट (लोणार) गावांचा समावेश आहे.

शेतकरी आज

मागणार दहा हजार

यवतमाळ : नापिकी, कर्जबाजारीपणातून आलेल्या आर्थिक अडचणीमुळे यवतमाळ जिल्ह्यातील २२ गावांतील शेतकऱ्यांनी पेरणीबंदचा निर्णय घेतला आहे. पण, पेरणीसाठी पैशांअभावी ताटकळत बसलेल्या शेतकऱ्यांनी घोषणेप्रमाणे दहा हजार रुपये सरकारने न दिल्यास आणखी काही गावांत पेरणीबंद होण्याचा धोका शेतकरी वारकरी संघटनेचे अध्यक्ष सिकंदर शहा यांनी वर्तविला आहे. याचा निषेध म्हणून आज, सोमवारी बँकेत जावून दहा हजार रुपये मागत आंदोलन करणार असल्याचेही त्यांनी स्पष्ट केले आहे.