म.टा. प्रतिनिधी, नागपूर
नागपूर महापालिका व ग्रामायण प्रतिष्ठान यांच्या संयुक्त विद्यमाने ३ ते ६ जानेवारीदरम्यान तिसऱ्या विदर्भस्तरीय ग्रामायण सेवा प्रदर्शनाचे आयोजन करण्यात आले आहे. वर्धा मार्गावरील शनिवार बाजार मेट्रो स्टेशनच्या बाजुला सीतानगर हॉटेल रेडीसन ब्ल्यू चौक येथे हे प्रदर्शन होणार असल्याचे महापौर नंदा जिचकार यांनी सांगितले.
महापालिकेत आयोजित पत्रकार परिषदेत जिचकार यांनी ग्रामायणाची माहिती दिली. यावेळी ग्रामायण प्रतिष्ठानचे रमेश लालवानी, संजय सराफ, अनुराधा सांबरे, मंजुषा रागीट, श्रीकांत गाडगे, अनिल सांबरे, चंद्रकांत रागीट आदी उपस्थित होते. चार दिवस हे प्रदर्शन चालणार असून सकाळी ११ ते रात्री ९ वाजेपर्यंत प्रदर्शनाला भेट देता येणार आहे. भारतीय गोवंश रक्षण संवर्धन परिषद व श्रीराम मंदिर सेवा समिती हे प्रदर्शनाचे सहआयोजक आहेत. ग्रामीण भागात काम करणाऱ्या लहान मोठ्या सेवाभावी संस्था, गट यांचे कार्य शहरापर्यंत पोहोचावे यासाठी हे प्रदर्शन भरविण्यात येणार आहे. महिला, युवा, शेतकरी, वंचित वर्ग, दिव्यांग अशा समाजातील सर्व घटकांना बळ देणारा हा उपक्रम असल्याचे यावेळी जिचकार यांनी सांगितले.
प्रदर्शनात रंगणार स्पर्धा
महापालिकेकडून जागेची व्यवस्था करण्यात आली आहे. यासह इतर मूलभूत सुविधाही पुरविण्यात येणार आहे. मनपाच्या विविध कार्यांची माहिती देणारे स्टॉलही प्रदर्शनात लावण्यात येणार आहे. प्रदर्शनात १५० स्टॉल राहणार आहेत. प्रदर्शनादरम्यान शालेय विद्यार्थी, अभियांत्रिकी विद्यार्थी आणि प्रौढ अशा तीन वयोगटांसाठी स्पर्धांचे आयोजन करण्यात येणार आहे. शालेय विद्यार्थ्यांसाठी पर्यावरणपूरक विज्ञान मॉडेल स्पर्धा, अभियांत्रिकी विद्यार्थ्यांसाठी ग्रामोपयोगी तंत्रज्ञानाचे मॉडेल स्पर्धा आणि प्रौढांसाठी टाकाउमधून टिकाऊ वस्तूंची निर्मिती करणारी स्पर्धा घेण्यात येणार असल्याचे आयोजकांनी सांगितले.