विरोधी पक्षनेत्यांची नोटीस; रमाई घरकुल योजनेबद्दलही विचारणा
म.टा.विशेष प्रतिनिधी,नागपूर
करोनाच्या पार्श्वभूमीवर शहरात काय उपाययोजना करण्यात आल्या, त्यावर चर्चेची नोटीस देण्यात आली आहे. येत्या शुक्रवारी होणाऱ्या महासभेत त्यावर चर्चा होणार आहे. विरोधी पक्षनेते तानाजी वनवे यांनी यासंदर्भात नोटीस दिली आहे.
जगातील जवळपास ९४ देशांमध्ये करोनाचा फैलाव झाला असून, लक्षावधी जनता या आजारामुळे पीडित आहे. तेवढेच संशयित आहेत. हजारोंच्या संख्येत मृत्यू झाले आहेत. यासंदर्भात महापालिकेतर्फे काय कारवाई करण्यात आली, काय उपाययोजना केली आहे, यावर चर्चेची ही नोटीस आहे. महासभेत मागच्या वेळच्या विषयपत्रिकेवरील विषयाचीही नोटीस देण्यात आली आहे. यात काँग्रेसचे ज्येष्ठ नगरसेवक संदीप सहारे यांनी घनश्याम पंधरे यांची सहायक आयुक्त-वॉर्ड अधिकारी म्हणून नियुक्ती केल्यानंतरही त्यांना वर्षभर ताटकळत ठेवण्यात येत असल्याने अनियमितता होत असल्याची शंका व्यक्त केली आहे. मनपातर्फे २० जून रोजी या पदासाठी देण्यात आलेल्या जाहिरातीत एकूण २४ उमेदवारांचे अर्ज प्राप्त झाले होते. अर्जपडताळणीनंतर सहा उमेदवारांचे अर्ज अपात्र ठरले. पाच उमेदवरांना ८ फेब्रुवारी, २०१९ रोजी मुलाखतीसाठी बोलविण्यात आले. त्यानंतर मुलाखतीच्या यादीनुसार घनश्याम पंधरे यांची पहिल्या क्रमांकावर व दुसऱ्या क्रमांकावर योगेश गेडाम यांची निवड करून प्रतीक्षायादीत ठेवण्यात आले. एक वर्षाचा कालावधी झाल्यानंतरही पंधरे यांना रुजू करून का घेण्यात येत नाही, अशी विचारणा सहारे यांनी नोटीसद्वारे केली आहे. भाजपचे नगरसेवक अॅड. धर्मपाल मेश्राम यांनी महापालिकेच्या झोन क्र. १ ते ५पर्यंत कचरासंकलनाची जबाबदारी असलेल्या ए. जी. एन्व्हायरो या कंपनीसोबत केलेला करार, नियमावली, त्यातील कलमे व त्याचे अनुपालन तसेच यासंदर्भातील अनियमिततेबाबत चर्चेची नोटीस दिली आहे. ज्येष्ठ नगरसेवक प्रफुल्ल गुडधे यांनी मनपात ऐवजदार स्वच्छता कर्मचाऱ्यांना नियमित करण्याच्या आदेशात अटी व शर्तींतील कलम १८मध्ये लाड-पागे समितीच्या शिफारशीअंतर्गत वारसा हक्काबाबतचा लाभ का वगळण्यात, आला अशी विचारणा करणारी नोटीस दिली आहे. विरोधी पक्षनेते तानाजी वनवे यांनी शहरातील रस्त्याच्या दुतर्फा सुरू असलेल्या इमारतींचे बांधकाम व त्यासाठी लागणारे साहित्य पडून असल्याने रहदारीस मोठा अडथळा निर्माण होत असल्याकडे लक्ष वेधले आहे. बांधकाम करणाऱ्यांनी साहित्य ठेवण्याकरिता महापालिकेची परवानगी घेतली आहे किंवा नाही, तसेच बांधकामानंतर उरलेल्या साहित्यांचा तसेच सीएनडी मटेरियल उचलण्याबाबत व ताबडतोब विल्हेवाट लावून रस्ता मोकळा करण्यास होत असलेल्या अनियमिततेबाबत नोटीस दिली आहे.
काँग्रेसच्या नगरसेविका आशा उईके यांनी गांधीबाग झोनअंतर्गत मोमिनपुरा भागातील यंग मुस्लिम फूटबॉल मैदानाच्या लीजबाबत विचारणा करणारी नोटीस चर्चेस दिली आहे. सार्वजनिक वापराचे मैदान कोणत्या नियमानुसार यंग मुस्लिम फूटबॉल क्लबकरिता दिले व या मैदानाची देखरेख क्लबकडून करण्यात येते का, अशी विचारणा केली आहे. मैदानावर गैरवाजवी बांधकामाची, अनियमिततेची चौकशी करण्यासंदर्भातील प्रश्नही त्यांनी विचारले आहेत. भाजपचे अॅड. धर्मपाल मेश्राम यांनी २०१७-१८, २०१८-१९ आणि २०१९-२० या तीन आर्थिक वर्षांत रमाई घरकुल योजनेत राज्य शासनाकडून किती रक्कम प्राप्त झाली, त्यापैकी किती रक्कम नेमकी खर्च झाली, त्याचप्रमाणे किती लाभार्थ्यांना या प्रत्येकी आर्थिक वर्षात योजनेचा लाभ मिळाला, किती लाभार्थ्यांचे प्रस्ताव मंजूर करून ते रकमेकरिता प्रलंबित ठेवले, याची विचारणा केली आहे.