म. टा. प्रतिनिधी, नागपूर
घरगुती वादातून चक्क फावड्याने हल्ला करून पत्नीची हत्या केल्याची घटना एमआयडीसी पोलिस ठाण्यांतर्गत समोर घडली. इंदिराबाई अशोक चौधरी (५०) रा. पंचशीलनगर, हिंगणा मार्ग, असे मृत महिलेचे नाव असून, अशोक गुलाबराव चौधरी (५३) असे आरोपीचे नाव आहे. पोलिसांनी त्याला अटक केली.
अशोकचे हिंगणा मार्गावर केस कर्तनालय आहे. तो मुळातच तापट स्वभावाचा आहे. त्याचे पत्नी इंदिराबाई यांच्याशी सतत वाद व्हायचे. या वादांमुळेच इंदिराबाई दहा वर्षांपूर्वी त्याला सोडून गेल्या होत्या. या दोघांना एक मुलगा व एक मुलगी आहे. सहा महिन्यांपूर्वी मुलगा नागेश चौधरी (२३) याचा विवाह केला. मुलगी मजुरीचे काम करीत असून, त्याच ठिकाणी राहाते. मुलाचा विवाह झाल्यानंतर आरोपीने पत्नीला सर्व विसरून घरी परतण्याची विनंती केली. त्यामुळे सहा महिन्यांपूर्वी ती मुलगा, सूनेसह आरोपीसोबत त्याच्या घरी राहायला आली. मुलगा कामाला जातो. गेल्या काही दिवसांपासून त्यांच्यात वाद सुरू होते.
दरम्यान, आरोपीने पत्नीकडे आपली कोणी काळजी घेत असल्याचे सांगून घर विकण्याची इच्छा व्यक्त केली. मुलगा विवाहित असून त्याला राहण्यासाठी घराची आवश्यकता असल्याने पतीने घर विकू नये, अशी तिची इच्छा होती. यावरून काल सोमवारी दुपारच्या सुमारास त्यांच्यात वाद झाला. त्यानंतर तो घराबाहेर गेला होता. संध्याकाळी ६ वाजेच्या सुमारास इंदिराबाई घराच्या दरवाजावर बसून सुनेसोबत भाजी कापत होत्या. त्यावेळी आरोपी घरी परतला व त्याने पत्नीसोबत भांडण करून खोलीच्या कोपऱ्यात ठेवलेल्या फावड्याने तिच्यावर वार केला. ती रक्तबंबाळ अवस्थेत जमिनीवर कोसळली. त्यानंतर आरोपी घरातून निघून गेला. सून प्रेमलता नागेश चौधरी (२३) हिने आरडाओरड करून शेजाऱ्यांच्या मदतीने सासूला रुग्णालयात दाखल केले. रात्री ८.३० वाजता उपचारादरम्यान मृत्यू झाला. दुसरीकडे आरोपी थेट पोलिस ठाण्यात पोहोचला व पत्नीला फावड्याने मारल्याचे सांगितले. त्यानंतर वरिष्ठ पोलिस निरीक्षक भारत क्षीरसागर, सहाय्यक निरीक्षक एस. एस. डेहनकर हे घटनास्थळी पोहोचले. तेव्हा डॉक्टरांनी इंदिराबाई यांना मृत घोषित केले होते. पोलिसांनी मृतदेह शवविच्छेदनासाठी पाठवून आरोपीला खुनाच्या गुन्ह्यात अटक केली.
..................