म. टा. विशेष प्रतिनिधी, नागपूर
मनपाची बहुप्रतीक्षित महासभा सोमवार, २४ सप्टेंबरला नियोजित आहे. मात्र, ही सभा होणार का, आयुक्त हजर राहणार का, हे प्रश्न कायम आहेत. अवैध धार्मिक स्थळांवरून दरम्यानच्या काळात उठलेले वादळ आणि आता महापौरांचा वादग्रस्त ठरलेली परदेशवारी यांसारख्या अनेक मुद्द्यांवरून ही सभा गाजण्याची शक्यता आहे.
सत्तापक्षाने या सभेसाठी आयुक्त वीरेंद्र सिंह यांनी हजर राहावे, असा आग्रह धरला होता. मात्र, अद्याप आयुक्तांच्या हजेरीची कुठलीही अधिकृत माहिती प्रशासनाकडे नाही. त्यामुळे ही सभा गाजणार की फुसकी ठरणार, याकडेही सर्वांचे लक्ष राहणार आहे. आयुक्त वीरेंद्र सिंह यांच्या सुटीमुळेच सत्तापक्षाने त्यांच्या १८ दिवसांच्या सुटीच्या काळानंतर सोमवार, २४ सप्टेंबरला महासभा घ्यावी, असा आग्रह धरला. त्यानुसार सभेची नोटीस काढण्यात आली. या सभेत आयुक्त सिंह असावेत, असा सत्तापक्षाचा आग्रह आहे. मात्र, आयुक्तांनी परस्पर सुटीचा अर्ज राज्य शासनाकडे पाठविल्याचीही चर्चा आहे. त्यामुळे त्यांच्यासाठी महासभा लांबणीवर टाकण्याऐवजी प्रभारी आयुक्त रवींद्र ठाकरे यांच्या उपस्थितीतीच महासभा आटोपती घेण्याच्या मन:स्थितीत सत्तापक्ष आला आहे. या सभेत काँग्रेसचे नगरसेवक बंटी शेळके यांचे सदस्यत्व कायम निलंबित वा त्यांचे नगरसेवकपद रद्द करण्याचा प्रस्ताव विचाराधीन आहे. सत्तापक्ष हा प्रस्ताव पारित करण्याच्या तयारीत असतानाच काँग्रेसनेही महापौर नंदा जिचकार यांनी मुलाला पीए बनवून परदेशवारी केल्याचा मुद्दा चर्चेला आणत त्यांचेही गैरवर्तन व मनपाची फसवणूक केल्याचे कारण पुढे करीत अविश्वासाच्या नोटीस चर्चेला देण्याची तयारी चालविली आहे.