विस्तार अधिकारी सुटले, अभियंता सापडले

विस्तार अधिकारी सुटले, अभियंता सापडले

म. टा. प्रतिनिधी, गोंदिया

गोरेगाव तालुक्याच्या चिचगाव येथील महाराष्ट्र ग्रामीण रोजगार हमी योजनेच्या कामातील गैरव्यवहाराच्या चौकशीकरिता पंचायत समितीचे विस्तार अधिकारी आणि कनिष्ठ अभियंता चिचगावात आले होते. परंतु, थातूरमातूर चौकशी करून विस्तार अधिकारी निघून गेले. त्यामुळे संतप्त झालेल्या मजुरांनी कनिष्ठ अभियंत्यांना रोखून धरत घेराव घातला.

महाराष्ट्र ग्रामीण रोजगार हमी योजनेंतर्गत चिचगाव येथे पांदण रस्ता, शौचालय बांधकाम यासह इतरही कामांना सुरुवात करण्यात आली. दोन ते तीन महिन्यांपूर्वी हे काम हाती घेण्यात आले. या कामावर दीडशे मजूर कार्यरत होते. मध्यंतरीच्या कालावधीत रोजगार सेवक, सरपंच व उपसरपंच यांनी संगनमत करीत बोगस मस्टर तयार केला. जे मजूर कामावर आले नाहीत. त्यांची नावे मस्टरवर चढविली. कार्यरत मजुरांपैकी जवळपास ६० मजुरांकडून प्रत्येकी एक मजूर या प्रमाणे आठवड्याला १८० रुपये वसूल केले. अधिक मजुरी काढण्याच्या नावावर ही रक्कम रोजगार सेवक, सरपंच व उपसरपंचाने उकळली. एवढेच नव्हे तर, जॉब कॉर्ड बनवून देण्याच्या नावावर २०० रुपये मजुरांकडून घेतले. याशिवाय शौचालय बांधकामासाठी ज्या लाभार्थ्याने ५०० रुपये दिले, त्याचेच शौचालय बांधण्यात आले. ज्यांनी ही रक्कम दिली नाही, त्यांना डच्चू दाखविण्यात आला. दरम्यान, या गैरव्यवहाराची तक्रार चिचगावचे माजी सरपंच जितेंद्रकुमार कटरे यांनी पंचायत समितीच्या विस्तार अधिकाऱ्यांकडे केली. या तक्रारीनुसार प्रकरणाच्या चौकशीसाठी विस्तार अधिकारी गिऱ्हेपुंजे व कंत्राटी कनिष्ठ अभियंता विजय रहांगडाले हे सकाळी चिचगाव ग्रामपंचायतीत आले. परंतु, थातूरमातूर चौकशी करीत निघून गेले. संतप्त मजुरांनी कनिष्ठ अभियंत्यांचे वाहन रोखून धरत घेराव घातला.

लाचखोर रोजगारसेवकावर गुन्हा

गोंदिया : मजुरी वाढवून देण्यासाठी गँगमेटकडे ५४० रुपयांची लाच मागणाऱ्या रोजगार सेवकावर गुन्हा दाखल करण्यात आला. ही कारवाई लाचलुचपत प्रतिबंधक विभागाने केली. सुरेश सुखदेव मरघडे (४०), रा. मुरपार असे आरोपीचे नाव आहे.

यातील तक्रारदार हे मुरपार येथे रोजगार हमीच्या कामावर गँगमेट म्हणून काम करतात. त्यांच्या हाताखाली सहा मजूर आहेत. ४ मे रोजी नाला खोदकाम व सफाईचे काम करण्यात आले. या वेळी रोजगारसेवक सुरेश मरघडे याने मजुरीत वाढ करण्यासाठी ५४० रुपयांची मागणी गँगमेटकडे केली. परंतु, ही रक्कम देण्याची इच्छा नसल्याने तक्रारदाराने ५ मे रोजी लाचलुचपत प्रतिबंधक विभागाकडे तक्रार दाखल केली. त्यानुसार, पथकाने ६ मे रोजी कामाच्या ठिकाणी पडताळणी केली. या वेळी रोजगारसेवक सुरेश मरघडे लाच मागत असल्याची खात्री झाली होती.