यवतमाळ @४६; यंदाच्या मोसमातील सर्वाधिक तापमानाची नोंद

म. टा. प्रतिनिधी, नागपूर: यंदाच्या मोसमातील सर्वाधिक तापमान रविवारी यवतमाळ येथे नोंदविण्यात आले. यवतमाळ येथे ४६ अंश सेल्सिअस इतक्या तापमानाची नोंद करण्यात आली. यंदाच्या मोसमात पहिल्यांदाच तापमान ४५ अंशांपेक्षा अधिक नोंदवले गेले.

गेल्या काही दिवसांपासून विदर्भात होत असलेल्या वादळी पावसामुळे मे महिन्यातसुद्धा पारा ४५ पर्यंत पोहोचू शकलेला नाही. यंदाचा उन्हाळाही पावसात वाहून जाणार की काय, असा प्रश्न विदर्भवासियांपुढे उभा आहे. परंतु आता पारा वाढू लागला आहे. सोमवारपासून नागपूरसहित बहुतांश विदर्भातील हवामान कोरडे राहणार असून, २१ मे पासून उष्णतेच्या लाटेचा अंदाज वर्तविण्यात आला आहे.

मागील काही दिवसांपासून दररोज संध्याकाळी किंवा रात्री ढगांच्या गडगडाटासह वादळी पावसाची हजेरी लागते आहे. रविवारीसुद्धा नागपूर, गडचिरोली आणि चंद्रपूर येथे काही ठिकाणी पावसानं हजेरी लावली. दरम्यान रविवारी विदर्भात यवतमाळनंतर अकोला येथे ४३.८ अंश सेल्सिअस आणि नागपूर येथे ४१.७ अंश सेल्सिअस तापमानाची नोंद करण्यात आली. सोमवारपासून विदर्भातील बहुतांश जिल्ह्यांमधील हवामान कोरडे राहणार आहे. ढगाळ वातावरण संपून आकाश निरभ्र झाल्यावर तापमानात परत एकदा वाढ होण्याची शक्यता आहे. त्यानंतर २१ मेपासून पुढील दोन दिवसांसाठी वाशिम, गडचिरोली, बुलडाणा आणि भंडारा वगळता विदर्भातील सर्वच जिल्ह्यांमध्ये उष्णतेच्या लाटेचा अंदाज व्यक्त करण्यात आला आहे. या दरम्यान तापमान ४३ ते ४५ अंशांच्या आसपास राहण्याची शक्यता आहे. मे महिन्याच्या पहिल्या आठवड्यात पहिली उष्णतेची लाट आली होती. त्यानंतर पावसामुळे पारा घसरला.

आरक्षित जलसाठ्यांत ८० टक्के पाणी

२६ रोजी अनुभवा ‘झिरो शॅडो डे’