महिला डॉक्टरवर गुन्हा

म.टा. वृत्तसेवा, यवतमाळ

महिला रुग्णावर उपचार करताना त्यात मोठ्या प्रमाणात हयगय करण्यात आली. त्यामुळेच महिला रुग्णाचा मृत्यू झाला, असा अहवाल याप्रकरणाची चौकशी करणाऱ्या जिल्हास्तरीय चौकशी समितीने दिला. यामुळे येथील गुजर मॅटर्निटी फर्टिलिटी सेंटरच्या डॉ. ग‌ीतांजली विवेक गुजर यांच्याविरुद्ध बुधवारी लोहारा पोलिसांत गुन्हा दाखल करण्यात आला.

ज्या जोडप्यांना मुले होत नाही त्यांच्यावर विशेष उपचार केला जातो, अशी प्रसिद्धी डॉ. गीतांजली गुजर यांनी केली होती. त्यानुसार येथील प्रज्ञा भगत ह्या याबाबतच्या उपचारासाठी दारव्हा मार्गावरील गुजर मॅटर्निटी फर्टिलिटी सेंटरमध्ये उपचारासाठी वर्षभरापूर्वी दाखल झाल्या होत्या. डॉ. ‌गीतांजली यांनी तपासणी केल्यानुसार प्रज्ञा यांच्या गर्भपिशवीची लेप्रोस्कोपीद्वारे चाचणी करावयाची होती. त्यामुळे डॉ. गीतांजली यांनी प्रज्ञा यांची लॅप्रोस्कोपीद्वारे तपासणी केली. त्यानंतर प्रज्ञा यांना निरीक्षणासाठी रुग्णालयात न ठेवता त्यांना घरी जाऊ दिले. घरी गेल्यानंतर प्रज्ञा यांना अतिरिक्त रक्तस्त्राव होऊन त्यातच त्यांचा मृत्यू झाला. प्रज्ञा यांच्या मृत्यूमुळे त्यांच्या नातेवाईकांकडून संताप व्यक्‍त करण्यात येत होता.

या प्रकरणात डॉ. गीतांजली गुजर यांनी हयगय केल्याचा आरोप प्रज्ञा यांच्या पतीने केला. त्यानुसार नियमाप्रमाणे हे प्रकरण जिल्हास्तरीय चौकशी समितीसमोर चौकशीसाठी देण्यात आले. समितीने केलेल्या चौकशीत डॉ. गीतांजली यांनी उपचारामध्ये हयगय केल्याचा व बेजाबदारपणाने उपचार केल्याचा अहवाल सादर केला. हा अहवाल प्राप्त होताच सरकारतर्फे पोल‌िस निरीक्षक कवडू चांदेकर यांनी दिलेल्या तक्रारीवरून बुधवारी लोहारा पोलिसांनी डॉ. गीतांजली गुजर यांच्याविरुद्ध भादंविच्या ३०४ कलमान्वये गुन्हा दाखल केला आहे.