विधवेशी तरुणाचे सूत जुळले; गर्भवती झाली अन् तिचे बाळ विकले; नागपुरात धक्कादायक प्रकार

नागपूर : कोराडीमध्ये राहणारी ३० वर्षीय पीडित महिलेच्या पतीचा खून झाला. तेव्हापासून ती एकटी राहत होती. यानंतर नातेवाईक असलेला विवाहित तरुण तिच्या घरी यायला लागला. त्याची पत्नीही प्रियकरासोबत पळून गेली होती. त्यामुळे तोही एकटा होता. त्यांचे सूत जुळले. दोघांनी सहमतीने शारीरिक संबंध प्रस्थापित केले. यातून महिला गर्भवती झाली.

गर्भवती झाल्याने महिला सप्टेबर २०२१ मध्ये आरोपी डॉ. नितेश मौर्य (वय ३७ मनीष नगर, सोमलवाडा) याच्या रुग्णालयात गेली. तिथे रेखा पुजारी (रा. नारा रोड, निर्मल कॉलनी) या परिचारिकेने तिला विश्वासात घेतले. डॉ. मौर्य आणि रेखा यांनी या महिलेला नवजात बाळ विक्री करणाऱ्या टोळीची प्रमुख श्वेता सावळे ऊर्फ आयशा खान हिच्याकडे पाठविले. आयेशाचा पती मकबूल खान, दलाल सचिन रमेश पाटील यांनी तिला सुनेसाठी बाळ दत्तक घ्यायचे असल्याचे सांगून बाळाला जन्म देण्यास भाग पाडले. विधवा महिलेनेही अपमानाची भीती टाळण्यासाठी प्रसूतीनंतर लगेचच मूल तिच्याकडे सोपवण्याचा निर्णय घेतला. मार्च २०२२ ला आरोपी आयशाने गर्भवती विधवा महिलेला बालाघाट येथील क्लिनिकमध्ये दाखल केले. गर्भवती महिलेच्या जीवाची पर्वा न करता तिने बळजबरीने सिझेरियन करून बाळाला गर्भातून बाहेर काढले. अवघ्या दोन दिवसांच्या बाळाला परप्रांतात पाच लाखांत विकले.

गुन्हे शाखेच्या मानवी तस्करी विरोधी पथकाच्या प्रमुख रेखा संकपाळ यांनी नवजात बाळांच्या विक्रीची माहिती गोळा केली. त्यात आयेशाच्या टोळीने आणखी बाळाची विक्री केल्याचे लक्षात आले. संकपाळ यांनी लगेच डॉ. सुनील मौर्य आणि रेखा पुजारी यांची चौकशी केली. रेखा हिने आयेशाच्या मदतीने बाळ विकल्याची कबुली दिली.