तुमची छोटी कृती वाचवेल उद्याचे संकट

'ग्रीन व्हिजिल'च्या स्वयंसेवकांकडून जनजागृती

म. टा. प्रतिनिधी, नागपूर

बदलत्या जीवनशैलीमुळे पाण्याचे भीषण संकट आपल्यापुढे उभे राहत आहे. या संकटापासून बचाव करायचा असेल तर प्रत्येकाला आपल्या रोजच्या जीवनशैलीत थोडा बदल करण्याची गरज आहे. झाडांना पाणी द्या, पाणी वाया घालवू नका, असे संदेश देत ग्रीन व्हिजिलच्या स्वयंसेवकांनी जागतिक जलदिन साजरा केला.

फुटाळा तलाव येथे ग्रीन व्हिजिलचे स्वयंसेवक एकत्र आले. पाणी बचतीसोबतच पर्यावरण बचतीचे संदेश देणारे फलक त्यांच्या हातात होते. कौस्तुभ चटर्जी, डॉ. कविता रमन यांच्या मार्गदर्शनाखाली सुरभी जयस्वाल, मेहुल कोसुरकर, कल्याणी वैद्य, विष्णूदेव यादव, शीतल चौधरी, विकास यादव, दिगंबर नागपुरे, अमोल भालमे, यश केडिया, अर्जुन अग्रवाल, खूष अग्रवाल, चिराग पोतदार, करण नशिने, दादाराव मोहोड, नीरज अग्रवाल या स्वयंसेवकांनी जनजागृतीचा संदेश दिला.

तरच वाचेल पाणी!

पाणीबचतीची सुरुवात तुमच्या घरापासून करा. झाडांना पाणी देताना आळे करा, आंघोळीच्या वेळी शॉवरचा वापर करू नका, पाइपने गाड्या धुऊ नका, कमी कपडे असेल तर वॉशिंग मशीनचा वापर करू नका, नळातून पाणी काढताना धार छोटी ठेवा, पाण्याच्या पाइप लाइनला लिकेज असतील तर ते दूर करा, असे संदेश नागरिकांना देण्यात आले.