प्रेयसीसाठी केली आमदाराकडे चोरी

नोकराला अटक

म.टा. प्रतिनिधी, नागपूर

प्रेयसीची हौस भागविण्यासाठी विधानसभेतील काँग्रेसचे उपनेते विजय वडेट्टीवार यांच्याकडे नोकरानेच चोरी केल्याची घटना उघडकीस आली आहे. याप्रकरणी सीताबर्डी पोलिसांनी चोरीचा गुन्हा दाखल करून नोकराला अटक केली आहे. राहुल गंगाधर ठाकरे (वय २६, मूळ रा. सोनपुरी, ता. उमरेड) असे अटकेतील नोकराचे नाव आहे.

पोलिसांनी दिलेल्या माहितीनुसार, वडेट्टीवार हे रामदासपेठेतील कमलाताई निवास येथे कुटुंबासह राहतात. गत तीन वर्षांपासून राहुल हा त्यांच्याकडे काम करतो. तो वडेट्टीवार यांचा विश्वासू आहे. राहुलची चंद्रपूर येथे प्रेयसी आहे. तिची हौस भागविण्यासाठी तो वडेट्टीवार यांच्याकडे चोरी करायला लागला. काही दिवसांपूर्वी त्याने प्रेयसीला मोबाइलही घेऊन दिला. तीन दिवसांपूर्वी लॉकरमध्ये असलेल्या दोन लाख रुपयांमधून ७० हजार रुपये गायब झाल्याचे समोर आले. वडेट्टीवार यांच्या नातेवाइकांनी राहुलला विचारणा केली. त्याने पैसे गायब झाल्याबाबत काहीही माहिती नसल्याचे सांगितले. वडेट्टीवार यांचे पुतणे शिव संजय वडेट्टीवार यांनी सीताबर्डी पोलिसांत तक्रार दिली. राहुल याच्यावर संशय व्यक्त केला. सीताबर्डी पोलिसांनी चोरीचा गुन्हा दाखल केला. वरिष्ठ पोलिस निरीक्षक हेमंतकुमार खराबे यांनी यांनी राहुलची चौकशी केली. चौकशीदरम्यान राहुलने चोरी केल्याचे निष्पन्न झाले. पोलिसांनी त्याला अटक केली.

चोरीचे पैसे उधार दिले

राहुलने दोन वर्षांत सुमारे दोन लाख रुपये चोरी केल्याची शक्यता आहे. त्याच्याकडे लॉकरची बनावट चावीही आढळली. चोरी केलेल्या ७० हजार रुपयांपैकी २० हजार रुपये त्याने अन्य एका नोकराला उधार दिल्याचे तपासादरम्यान समोर आले आहे.