हृदयद्रावक! देवदर्शनावरुन परतताना ६ वर्षीय मुलासह मामाचा अपघाती मृत्यू; लहान मुलगा गंभीर

जालना : धारकल्याण येथील सदानंद महाराज यांचे दर्शन घेऊन परत गावाकडे निघालेल्या दुचाकीस्वारांना कंटेनरने धडक दिल्याने भीषण अपघात झाला. या अपघातात ६ वर्षांचा चिमुकला व त्याचा मामा ठार झाला असून मामाचा मुलगा गंभीर जखमी झाला. ही घटना जालना तालुक्यातील धारकल्याण येथे जालना- सिंदखेड राजा रस्त्यावर मंगळवारी सकाळी १० वाजेच्या सुमारास घडली. मामा-भाच्याच्या अपघाती निधनाने परिसरात हळहळ व्यक्त होत आहे.

गजानन नारायण वाहुळ आणि स्वप्नील तेजराव बोर्डे अशी मृतांची नावे आहेत, तर ४ वर्षांचा चिमुकला रूद्र गजानन वाहूळ या अपघातात जखमी झालेला आहे.

मिळालेल्या माहितीनुसार, कडवंची येथील गजानन वाहूळ हे मुलगा रुद्र आणि भाचा स्वप्नील यांना घेऊन धारकल्याण येथील सदानंद महाराज मठ येथे दुचाकीने (क्रमांक. एम. एच. २१ बी. बी. ११८८ वरून मंगळवारी दर्शनासाठी गेले होते. दर्शन घेऊन ते दुचाकीवरून पुन्हा कडवंची येथे येत होते. मात्र धारकल्याण येथील कृष्णा उगले यांच्या शेताजवळ कंटेनरने (क्रमांक एम. एच. १२ ४७२०) त्यांच्या दुचाकीला जोराची धडक दिली. यात तिघेही गंभीर जखमी झाले होते. त्यांना तत्काळ जालना येथे उपचारासाठी हलविण्यात आले.

आई-वडील घरात अन् अंगणात खेळणाऱ्या चिमुकल्यावर काळाची झडप; घटनेनं परिसरात हळहळ

यातील स्वप्नील बोर्डे याला तपासून डॉक्टरांनी मयत घोषित केले, तर गजानन वाहूळ यांना औरंगाबाद येथे हलविण्यात आले. उपचार सुरू असताना त्यांचा देखील मृत्यू झाला. तर गजानन वाहूळ यांचा मुलगा रुद्र याच्यावर उपचार सुरू असल्याचे पोलिसांनी सांगितले. या

दरम्यान, या प्रकरणी राजू रंगनाथ वाहूळ यांच्या फिर्यादीवरून कंटेनर चालकाविरुद्ध तालुका जालना पोलीस ठाण्यात गुन्हा दाखल करण्यात आला आहे .या हृदयद्रावक घटनेमुळे गावात हळहळ व्यक्त करण्यात येत आहे.