'...तर अशोकराव तुम्ही दहा वर्षे मुख्यमंत्री राहिले असते'

नांदेड: स्वर्गीय विलासराव देशमुख यांची नाराजी ओढवली नसती तर अशोकराव तुम्ही दहा वर्षे मुख्यमंत्री राहिले असते, असं वक्तव्य माजी खासदार भास्करराव पाटील यांनी केलंय. माजी मुख्यमंत्री आणि सध्याचे सार्वजनिक बांधकाम मंत्री अशोक चव्हाण यांचे सख्खे मोठे मेहुणे असलेल्या भास्करराव पाटील यांनी नांदेडमध्ये जाहीर कार्यक्रमात हे वक्तव्य केलंय.

भास्करराव पाटील यांच्या वक्तव्यामुळे एकेकाळी नांदेड- लातूरमधली कटुता आता पुन्हा नव्याने चर्चेत येणार आहे. तर खतगांवकर यांच्या या वक्तव्यावर कार्यक्रमात उपस्थित काँग्रेस कार्यकर्त्यांनी टाळ्या वाजवून त्यांना प्रतिसाद दिलाय.

दरम्यान, महसूल आयुक्तालय नांदेडला करावे, असा ठराव तत्कालीन मुख्यमंत्री अशोक चव्हाण यांनी मंत्री मंडळाच्या बैठकीत घेतला होता. त्या ठरावामुळेच स्वर्गीय विलासराव देशमुख नाराज झाले आणि अशोक चव्हाण यांचे मुख्यमंत्री पद गेले असा दावा खतगांवकर यांनी केलाय. त्यांच्या या वक्तव्यामुळे राजकारणात नवा वाद ओढावण्याची शक्यता आहे.