नांदेड जिल्ह्यात दिवसभरात १५ रुग्ण, दोन मृत्यू

नांदेड : जिल्ह्यामध्ये शनिवारी करोनाच्या १५ नव्या रुग्णांची नोंद झाली, तर दोन जणांचा मृत्यू झाला. जिल्ह्यामध्ये गेल्या महिन्यात थैमान घालत असलेल्या करोनाचा प्रादुर्भाव आता काहीसा कमी होत असल्याचे दिसत आहे. आठवडाभरापासून जिल्ह्यातील परिस्थिती दिलासा देणारी ठरत आहे.

अर्धापूर येथील इंदिरा नगरमध्ये राहणाऱ्या ६५ वर्षीय महिलेचा, तर पाटबंधारे नगर परिसरातील एका ५४ वर्षीय इसमाचा उपचारादरम्यान मृत्यू झाला. दिवसभरात दोन हजार ७७४ जणांची चाचणी करण्यात आली. त्यापैकी १५ जणांचे अहवाल पॉझिटिव्ह आले. सध्या जिल्ह्यात ५२९ जणांवर उपचार सुरू असून त्यापैकी सहा जणांची प्रकृती चिंताजनक आहे. आतापर्यंत जिल्ह्यात एक हजार ८९७ जणांचा करोनामुळे मृत्यू झाला. उपचारादरम्यान रुग्ण बरे होण्याची टक्केवारी ९६.७३ आहे.