म. टा. वृत्तसेवा, मनमाड
रेल्वे मार्गावर गस्त घालणाऱ्या जागरुक रेल्वे कर्मचाऱ्याच्या सतर्कतेने रुळाला तडा गेल्याचे वेळीच लक्षात आले आणि डिलक्स एक्स्प्रेसमधील शेकडो प्रवाशांचे प्राण वाचले. संभाव्य भीषण अपघात टळल्याची घटना मंगळवारी (दि. १३) मध्यरात्री नांदगाव रेल्वे स्टेशनजवळ मध्य रेल्वे लोहमार्गावर घडली.
सूत्रांनी दिलेल्या माहितीनुसार, रोहिणी ते तळेगाव दरम्यान मंगळवारी मध्यरात्री लोहमार्गावर रेल्वे कर्मचारी वाल्मीक सोनवणे गस्त घालत होते. यावेळी त्यांना सेक्शन ३११/८-६ हा रेल्वे रुळ तुटलेला आढळून आला. त्याच वेळी समोरूनच त्यांना डिलक्स एक्स्प्रेस (गाडी क्रमांक १२१०२) येतांना दिसली.
सोनवणे यांनी सतर्कता दाखवित धावत्या रेल्वेला तातडीने लाल सिग्नल देऊन गाडी थांबवली आणि रेल्वे प्रशासनाला झालेल्या घटनेबाबत माहिती दिली. ट्रेक मेंटेनर धोंडू बागूल, योगेश गुजर, मोहन शंकर हे घटनास्थळी दाखल झाले. विनाविलंब मध्यरात्री तातडीने तुटलेला रुळ दुरुस्त करून जोडण्यात आला आणि त्यानंतर रात्री दोन वाजता डिलक्स एक्स्प्रेस मार्गस्थ करण्यात आली.
'तो' ठरला देवदूत
सोनवणे यांच्या जागरुकतेने मोठा अपघात टळला आणि शेकडो प्रवाशांचे प्राण वाचले. त्यानंतर मार्गावरील सर्व रेल्वे वाहतूक पूर्ववत सुरळीत करण्यात आली. सतर्कता व प्रसंगावधान दाखविणाऱ्या वाल्मीक सोनवणे या देवदूताचे प्रवाशांनी आभार मानले.