...अन् प्रवाशाला मिळाले जीवनदान

रेल्वे पोलिस आणि सुरक्षा दलाची तत्परता

म. टा. वृत्तसेवा, नाशिकरोड

रेल्वे पोलिस आणि रेल्वे सुरक्षा दल यांच्यात योग्य समन्वय असला की रेल्वे प्रवाशाचे मौल्यवान प्राणही वाचतात याचा प्रत्यय नाशिकरोडला आला. हृदयविकाराचा झटका आलेल्या रेल्वे प्रवाशाचे प्राण या दोन्ही दलांच्या समन्वयामुळे वाचले. त्याला जीवनदान मिळाले. प्रवाशांनी या दोन्ही दलांवर अभिनंदनाचा वर्षाव केला.

संतोष काळूराम मंदोरे (३८, मखमलाबाद, नाशिक) हे जळगावहून नाशिकला गीतांजली एक्स्प्रेसने येत होते. त्यांच्यासमवेत पत्नी निता होती. प्रवासादरम्यान मंदोरे यांना अचानक अस्वस्थ वाटू लागले. हृदयविकाराचा त्रास जाणवू लागला. सहप्रवाशांनी नाशिकरोड रेल्वे पोलिस आणि रेल्वे सुरक्षा दलाशी संपर्क साधला. नाशिकरोड पोलिस व रेल्वे सुरक्षा दलाने राज्य सरकारच्या १०८ क्रमांकाच्या दूरध्वनीवर संपर्क साधून रुग्णवाहिका आणि डॉक्टर तयार ठेवत मदत कार्याची व्यवस्था केली होती. सायंकाळी पाचला गीतांजली एक्सप्रेस नाशिकरोडला

येताच जवानांनी प्लॅटफॉर्म क्रमांक दोनवरून मंदोरे यांना खुर्चीवर बसवले. त्यांना रेल्वे रुळ ओलांडून कुली व कर्मचाऱ्यांच्या मदतीने प्लॅटफॉर्म क्रमांक एकवर आणले. तेथून रुग्णवाहिकेत बसवून तातडीने जिल्हा रुग्णालयात दाखल केले.

--------------------

रेल्वे प्रवाशांचे प्राण वाचवणे हे आमचे कर्तव्यच आहे. प्रवाशांना काही समस्या आल्यास त्यांनी दलाशी आवर्जून संपर्क साधावा. मदत करायला आम्ही तत्पर आहोत.

- नितीन पवार,

सहाय्यक निरीक्षक, लोहमार्ग पोलिस