धावन मार्ग मापनास प्रारंभ
म. टा. प्रतिनिधी, नाशिक
सातव्या राष्ट्रीय व बाराव्या राज्यस्तरीय नाशिक मविप्र मॅरेथान स्पर्धेचा धावन मार्ग मापनाचा शुभारंभ जिल्हा क्रीडाधिकारी रवींद्र नाईक, नाशिक जिल्हा अॅथलेटिक्स असोसिएशनचे सचिव राजीव जोशी व सरचिटणीस नीलिमा पवार यांच्या प्रमुख उपस्थितीत बुधवारी सकाळी झाला.
येत्या पाच जानेवारी रोजी होणारी स्पर्धा मविप्र मॅरेथान चौक येथून सुरू होऊन धोंडेगावपर्यंत व परत मॅरेथान चौक अशी असेल. मविप्र मॅरेथॉनसाठी इंटरनॅशनल असोसिएशन ऑफ अॅथलेटिक्स (आयएएएफ) मॅरेथान आणि रोड रेसेसच्या तांत्रिक नियमानुसार, स्पर्धेचे अंतर कॅलिब्रेटेड बायसिकल पद्धतीने निश्चित करावे लागते. त्यानुसार स्पर्धा संयोजन समितीने रोडचे अंतर मापन केले.
फुल मॅरेथॅान स्पर्धेला सकाळी साडेपाच वाजता प्रमुख अतिथींच्या हस्ते हिरवा झेंडा दाखविला जाणार आहे. स्पर्धेसाठी एकूण ७ लाख ६१ हजार रुपयांची रोख बक्षिसे देण्यात येणार आहे. नाशिक मविप्र मॅरेथान स्पर्धेस अॅथलेटिक फेडरेशन ऑफ इंडिया, महाराष्ट्र अॅथलेटिक असोसिएशन व नाशिक अॅथलेटिक असोसिएशन यांची मान्यता मिळाली आहे. स्पर्धा पूर्णतः तांत्रिक पद्धतीने घेतली जाणार आहे. तसेच फुल व हाफ मॅरेथान व १० किलोमीटर स्पर्धकांसाठी टायमिंग चीपची व्यवस्था करण्यात आली आहे. स्पर्धेच्या माहितीसाठी व नावनोंदणीसाठी www.nashikmvpmarathon.org या वेबसाईट वर भेट द्या, असे आवाहन करण्यात आले आहे.
अशी होणार स्पर्धा
मविप्र मॅरेथॉन स्पर्धा एकूण १७ गटांमध्ये घेतली जाणार आहे. यात सर्वात कमी अंतराची स्पर्धा पाचवी ते सातवीमधील विद्यार्थिनींसाठी तीन किलोमीटरची तर सर्वाधिक ४२.१९५ किलोमीटरची फुल मॅरेथॅान देशभरातील धावपटूंसाठी खुली असेल. खुल्या गटातील महिलांसाठी १० किलोमीटरची स्पर्धा घेण्यात येणार आहे. ३५ वर्षांवरील महिला गटासाठी पाच किलोमीटरची स्पर्धा तर ज्येष्ठ नागरिक पुरुषांसाठी ६० वर्षांवरील चार किलोमीटरचा स्वतंत्र गट तयार करण्यात आला आहे. ७५ वर्षांवरील पुरुषांसाठी तीन किलोमीटरची तसेच १८ वर्षाआतील मुले-मुलींसाठी सहा किलोमीटरची खुल्या गटाची स्पर्धा घेण्यात येणार आहे.